Байуæрста 160 хызыны продукттимæ. Ахæм æххуысæй адæм баззадысты разыйæ
Ацы зын уавæрты фæкæсынхъуаг адæймагæн баххуыс кæнын у арфæйаг хъуыддаг. Афтæ, Дигорайы цæрæг Цалиты Альберт æххуыс кæны, æгуыстæй чи баззад, кæнæ иунæгæй чи цæры, ахæм адæмæн. Байуæрста 160 хызыны продукттимæ. Ахæм æххуысæй адæм баззадысты разыйæ. Уæвгæ, Дигорайы хæрзаудæн акцитæ арæзт фæцæуынц арæх. Районы амалхъом адæм сæ хæсыл нымайынц æххуысхъуаг бинонты фарсмæ балæууын.
Æдæппæтæй 160 хызыны продукттимæ. Уый у зæрдæхæлар адæймаджы æххуыс. Цалиты Альберт Дигорайы цæрджытæн фыццаг хатт не ххуыс кæны. Фыццаджыдæр йæ ххуысы хай барвиты бирæсывæллонджын бинонтæн, ацæргæ адæмæн, стæй сæвзæрд уавæры тыххæй æгуыстæй чи баззади, ахæмтæн.
Фæсивæд æххуыс кæнынц активонæй. Æмбырд кæнынц продукттæ, æвæрынц сæ хызынты. Алкæцыйы дæр дзы æнæмæнг хъæугæ продукттæ.
Баххуыс кæнын кæмæн хъæуы, уыцы адæмы хыгъд сбæлвырд кодтой рагагъоммæ. Сæлбиты Ренатæ у сгуыхт ахуыргæнæг. Цæуы йыл 90 азы. Цæры иунæгæй. Уымæ гæсгæ йын ахæм æххуыс уыди æхсызгон.
Алкæйы дæр хæдзары баййафын къухы нæ бафты. Фæлæ уыцы бон алчидæр æххуысы хай райста. Дигорайы ис хæрзаудæн тæрхæг кæм ис, ахæм дукани дæр. Баххуымс кæнын кæй фæнды, уыдонæн дзы фадат ис продукттæ сæвæрынæн. Уый фæстæ сæ ратдзысты фæкæсынхъуаг адæмæн.
Зæрдæхæлардзинад адæмы кæны æнгомдæр. Цалиты Альберты алыварс æрбамбырд сты фæсивæды минæвæрттæ. Сæхицæн æй исынц дæнцæгæн. Алчидæр йæ бон куыд у, афтæ архайы акцимæ йе ххуысы хай бахæссыныл. Дигорайы цæры 12 мин адæймагмæ хæстæг. Бирæтæ дзы сты абон фæкæсынхъуаг. Фæлæ дзы ис ахæмтæ дæр, Цалиты Альберты хуызæн йе ххуыс чи нæ бавгъау кæндзæн.
