Йæ ном зонынц, зын уавæрты чи бахауд, уыдон се ппæт дæр
Экстремал, гид æмæ зæрдæхæлар адæймаг. Нæ дарддæры æрмæджы хъайтар у Дмитрий Лобойко. Йæхæдæг сæмбырд кодта Нива æмæ УАЗ-ы гибрид. Йæ фæрцы республикæйы хæхты бирæ хæттыты æххуыс кодта автомобилисттæн. Ныр Дмитрийы ном зонынц, зын уавæрты чи бахауд, уыдон се ппæт дæр. Бæлвырддæр радзурдзæн Хъайтмазты Дзерассæ.
Видеойы кæмæ дзурынц, уыцы Димон æххуысмæ араст вæййы, зын бацæуын кæдæм у, ахæм бынæттæм, арæх сæм бахæццæ вæййы æнæнхъæлæджы уавæрты министрады кусджытæй раздæр. Экстремалы ныхæстæм гæсгæ фæлтæрдджын шофыртæ дæр хъуамæ зоной сæ арæхстдзинадæн аргъ кæнын. Куыд зæгъы, афтæмæй ацы бынæттæ раджы базыдта, фæлæ хæхтæ рæдыдтытæ нæ хатыр кæнынц. Ам алцыдæр æндæрхуызон у, суанг ма фæндаггон æгъдæуттæ дæр.
Рæхыстæ, динамикон тростæ, лебедкæ, сæрмагонд фидаргæнæнтæ, уæлæмхасæн рухс, æмæ ма резинæ цырыхъхъытæ дæр. Æмæ уый у æппæтæй хъæугæдæр дзауматы номхыгъд.
Дмитрий Лобойко йæ машинæ хоны цæлхытыл трактор. Йæхæдæг сæмбырд кодта Нивæ æмæ УАЗ-ы гибрид. Хъазгæйæ йæ схуыдта «НИУАЗ».
Экстремалон цыд – куыд рагон хобби, адæмы ирвæзын кæнын та – йæ фæстиуæг. Фыццаг Дмитрий æххуыс кодта йе мбæлттæн, уый фæстæ йæм райдыдтой сидын æнæзонгæ адæм. Куыд зæгъы, афтæмæй йыл раздæр хиуæттæ мæт кодтой. Фæлæ рæстæгимæ бамбæрстой, æцæгдæр, Дмитрий куы нæ уа, уæд чи. Нæлгоймаг баххуыс кодта, дæсгай, гæнæн ис, æмæ сæдæгай адæмæн дæр. Се *хсæн бирæтæ сты Дмитрийы хуызæн экстремалтæ.
Фæстаг видеотæй иу ист у Дыгургомы æхсæрдзæн Гæлдæридонмæ фæндагыл. 3-æм январы машинæ былæй атахт, йæ фарсыл æрхауд хохы тигъыл. Чи дзы бадтис, уыдон аирвæзтысты. Дæлджинæгмæ ныххауынæй машинæ бауырæдта дур. Шофыр æмæ бæлцæттæн бантыст рахизын. Транспорт сисынмæ йæ ныфс ничи хаста. Фæлæ Дмитрий бауæндыд.
Дмитрий Лобойко кусы автосервисы. Моторты тыххæй алцыдæр зоны. Ам архайы йæхи машинæимæ дæр. Куыд зæгъы, афтæмæй ахæм автомобиль хъуамæ цалцæг кæна æрмæст йæ хицау. Уый хæхты уыдзæн æххуыс – исты куы асæтта, уæд æй дæхæдæг сраст кæндзынæ. Уымæй дарддæр ма Дмитрий у профессионалон гид. Ацыд фæлтæрддзинад фылдæргæнæн курсытæ. Ныр адæмы зонгæ кæны республикæйы рæсугъддæр бынæттимæ.
