Æрмæст республикæйы клиникон рынчындонмæ суткæмæ æххуысагур æрбацыдысты 240 адæймаджы
Дохтырты бæрæггæнæнтæм гæсгæ, коронавирусæй рынчынты нымæц республикæйы кæны фылдæр. Æрмæст республикæйы клиникон рынчындонмæ суткæмæ æххуысагур æрбацыдысты 240 адæймаджы. Ахæм рекорды тыххæй йæ телеграмм-каналы фехъусын кодта рынчындоны сæйраг дохтыр Митциты Астан. Фæлæ, аппаратон æмбырды æнæниздзинадхъахъхъæнынады министры хæстæ æххæстгæнæг Тебиаты Сослан куыд фæнысан кодта, афтæмæй фæуæлдæр ис вакцинацийы æмвæзад дæр. Ивгъуыд къуырийы процедурæ ацыдысты 3 мины 5 сæдæ адæймаджы. Уый, уымæй размæ къуырийæ у мин адæймаджы фылдæр. Иммунизаци цæуы горæты æппæт поликлиникæты æмæ районты медицинон куыстуæтты. Республикон профилон ведомствæйы бæрæггæнæнтæм гæсгæ, æппæты райдианæй нырмæ «Спутник – V»-ы фыццаг компонентæй прививкæтæ скодтой 147 мин адæймаджы, дыууæ компонентон цикл ацыдысты 142 мин адæймаджы. «Спутник лайт»-æй пайда кæнынц ревакцинацийы, кæнæ та ковидæй рынчын чи уыди, ахæм адæм. Специалистты ныхæстæм гæсгæ, вакцинаци раздæрау у, низæй бахъахъхъæнынæн æппæтæй ахадгæдæр фæрæз.
