Нырæй фæстæмæ ахуырад исдзысты ног бынаты æмæ ног æмбæлттимæ
Мæйы размæ дæр ма сæ бон ахъуыды кæнын нæ уыди, сæ райгуырæн хæдзарæй дард кæй ахуыр кæндзысты, ууыл. Донбассæй Цæгат Ирыстонмæ чи ссыд, уыцы сывæллæттæ сбадтысты математикон лицейы партæты уæлхъус. Нырæй фæстæмæ ахуырад исдзысты ног бынаты æмæ ног æмбæлттимæ. Лæппуты æмæ чызджыты куыд суазæг кодтой, уый тыххæй бæстондæр радзурдзæн Гуытъиаты Алинæ.
Донецкы адӕмон республикӕйӕ Цӕгат Ирыстонмӕ чи ссыдис, уыцы сывӕллӕттӕ райдыдтой ахуыр кӕнын. Ног ахуырдзаутыл республикӕйы физикон математикон лицейы зӕрдиагӕй сӕмбӕлдысты.
Ӕртындӕсаздзыд Варвара Буц Ирыстонмӕ ссыдис йӕ кӕстӕр хо Марияйымӕ. Къуыри сын фаг уыдис, цӕмӕй ног уавӕртыл сахуыр уой, уымӕн. Скъоламӕ ӕрбацыдысты цингӕнгӕйӕ.
Математикон лицейы ног ахуырдзауты ӕрбацыдмӕ зӕрдиагӕй ӕнхъӕлмӕ кастысты. Сывӕллӕттӕн ис куратортӕ, уыдон сын ӕххуыс кӕндзысты ног уавӕрты ахуыр кӕнынмӕ. Семӕ ма кусдзӕн психолог дӕр.
Фыццаг урочы Донецкӕй сывӕллӕттӕ равдыстой, ахуыр кӕнын сӕ куыд тынг фӕнды, уый.
Ахуыры рӕстӕг сывӕллӕтӕ фервӕзынц сӕ уӕззау хъуыдытӕй. Сеппӕтӕн дӕр сӕ бӕллиц у иу.
Варварӕйы ныййарджытӕ баззадысты Донецкы. Чызг та йӕ зӕрдӕ дары, тагъд рӕстӕг кӕй фембӕлдзысты, ууыл.
