Стыр æргом аздæхтой, коронавирусы инфекци йæхиуыл чи банкъардта, уыцы донортæм
Доноры æппæтдунеон боны агъоммæ Цæгат Ирыстоны тугдæттæн станцæйы арæзт æрцыдысты алывæрсыг мадзæлттæ: лекцитæ, флешмобтæ æмæ æндæр фембæлдтытæ. Стыр æргом аздæхтой, коронавирусы инфекци йæхиуыл чи банкъардта, уыцы донортæм. Уыдонмæ ныр фæзындысты сæрмагонд буаргъæдтæ, æмæ æнæмæнг хъæугæ фæуыдзысты ацы низæй уæззау рынчынтæн.
Алексей Лустин у активон донор. Туг радта 22 хатты. Куыд зæгъы, фтæмæй йæ уымæ разæнгард кодта йæ маджы дæнцæг. Ныр арæх бабæрæг кæны горæты тугдæттæн станцæ.
Ацы хъуыддаджы хорз миниуæгыл банымайæн ис уый, æмæ доноры туг кæны ивгæ. Адæймаджы скондмæ гæсгæ цыбыр рæстæгмæ туг сног вæййы. Уымæй уæлдай, туг дæттын райдыдтой, ныридæгæн коронавирусæй рынчын чи уыди, уыцы адæм. Сæ плазмæ дæттынц уæззау рынчынты ахадгæйæ сдзæбæх кæныны тыххæй. Уæрæсейы федералон медикон-биологон агентады хæслæвæрдмæ гæсгæ, сæ фæлтæрддзинадимæ базонгæ кæныны тыххæй, æмæ хъуыддагмæ бæстонæй цæстдарыны тыххæй Стъараполы крайæ ссыдысты специалисттæ.
Коронавирус йæхиуыл чи бавзæрста, уыдонæй иу у Джиджойты Майæ. Республикæйы клиникон рынчындоны медицинон хо, йæхиуыл нæ ауардгæйæ, фæллой кодта, æмæ æххуыс кодта коронавирусæй рынчын адæмæн. Фæлæ фæстагмæ йæхæдæг фæрынчын. Рынчындонмæ бахауди æртæ къуыримæ. Низыл фæуæлахиз. Фæстæмæ æрлæууыди йе мкусджыты æмрæнхъ. Ныр та йæ туг дæтты, цæмæй иннæ рынчынтæн дæр баххуыс кæна.
Проект #МыВместе-йы фæлгæты туг дæттынмæ хонынц кæй фæнды, уыдоны се ппæты дæр. Донор суæвын йæ бон у 18 азæй уæлæмæ кæуыл цæуы, ахæм адæймагæн. Æцæг хъуамæ уа æнæниз. Тугдæттыны центры волонтер-медиктæ адæмы зонгæ кæнынц донор суæвынмæ куыд бацæттæ кæнын хъæуы, уыимæ. Стæй дзы ахджиаг у, инфекцион низты профилактикæ.
Стыр æппæтуæрæсеон донорон акци райдыдта знон, абон цæуы дарддæр. Бæлвырддæ хабæрттæ базонæн ис тугдæттæн станцæйы сайты.
