Абон æрдз æмæ æрдзон ресурстæ хъахъхъæныны министрады кусджытæ, Хæххон-металлургон институты æмæ хæххон-металлургон техникумы студенттæ рацыдысты Терчы былгæрæттæ ссыгъдæг кæныны акцимæ.
Доны бон æппæт дунейы бæрæг кæнынц 1993-æм азæй фæстæмæ 22-æм мартъийы. Арæзт уыд иугонд нациты организацийы генералон ассамблейæйы хъæппæрисæй. 2005-æм азæй 2015-æм азмæ та акци цæуы ахæм нысанимæ – «Дон – цардæн». Афтæмæй адæмы зæрдыл лæууын кæнынц доны ахадындзинад. Æмæ йын йæ сыгъдæгдзинад хъæуы хъахъхъæнын. Хæххон-металлургон институты æмæ хæххон-метталлургон техникумы студенттæ Терчы алыварс ссыгъдæг кæнынц афæдз 4 хатты.
Цгъойты Таймураз, экологи æмæ техносферон æдасдзинады кафедрæйы сæргълæууæджы хæдивæг: «Уæхæдæг уынут, цас фæсивæд рацыдис æмæ куыд æмбырд кæнынц бырæттæ, уый. Æмæ мæн фæнды, ацы бырæттæ чи калы уыдонмæ хъæуы дзурын, цæмæй сæ ма калой, æмæ мах алы аз дæр ардæм ма цæуæм. Фыццаджыдæр хъæуы профилактикон куыст. Нæ хъæуы бырæттæ калын, кæм улæфыс, уым».