Уæрæсейы фæлхасадмæ цæстдарды Управленийы специалистты бæрæггæнæнтæм гæсгæ, уæлдæфы æппæрццæг буаргъæдтæ нæй.
Доваторы проспекты знон цы зынгсирвæзт æрцыд, уый фæстиуджытæ ныртæккæ зианхæссæг не сты.
Уæрæсейы фæлхасадмæ цæстдарды Управленийы специалистты бæрæггæнæнтæм гæсгæ, уæлдæфы æппæрццæг буаргъæдтæ нæй. Уæ зæрдыл уын æрлæууын кæндзыстæм, зынгсирвæзт æрцыд куыстуат «Фæндыр»-ы территорийы. Хæстæгдæр хæдзæртты цæрджытæ хъаст кодтой æвзæр тæфæй æмæ улæфæнтæ кæй æхгæдта, уымæй. Куыддæр арт парахат кæнын райдыдта, афтæ æвæстиатæй хъусынгæнинаг фæзынд социалон хызты. Зынгхуыссынгæнджытæ бынатмæ куы рбацыдысты, уæд рабæрæг, фыдбылыз æрцыд куыстуат «Фæндыр»-ы скълады. Арт апарахат 40 квадратон метрыл. Зынгсирвæзт банымадтой фыццаг къæпхæныл. Бынаты куыстой сæрмагонд техникæйы 6 машинæйы æмæ 20 зынгхуыссынгæнæджы. Æнæнхъæлæджы уавæрты министрады хъусынгæнинагмæ гæсгæ дзы хъыгдард ничи баййæфта. Зынгсирвæзты аххосæгтæ æвзарынц специалисттæ. Фæлæ йæ чи федта, уыдоны хъуыдымæ гæсгæ, гæнæн ис, æмæ скълад басыгътой барæй. Уымæн æмæ арæзтады нæй газ, электрон тых, æмæ хибарæй йæ ссудзын нæ уыди. Территоримæ бацæуыны бон та у алкæмæн дæр. Фæлхасадмæ цæстдарды цæгатирыстойнаг Управленийы æмæ экологон лабораторийы кусджытæ уæлдæфæй систой пробæтæ, æмæ сын скодтой экспертизæ. Сæ хатдзæгмæ гæсгæ, горæты цæрджытæн тæссаг ницæмæй у.
