Дзæуджыхъæуы кусы диабеты скъола
Дунейы сбæрæг кодтой сæкæрнизы ныхмæ тох кæныны бон. Дзæуджыхъæуы кусы диабеты скъола. Дохтыртæ зæгъынц, йæ ахадындзинад ахсджиаг кæй у, уый. Базонæн дзы ис куыд низы тыххæй, афтæ йæ дзæбæх кæныны мадзæлтты тыххæй дæр. Пациенттæн радзурынц, рынчынмæ куыд зилын хъæуы, стæй низы фæстиуджыты профилактикæйыл куыд архайын хъæуы, уый. Республикæйы эндокринологон диспансеры бæрæггæнæнтæм гæсгæ, æдæппæтæй диабетæй рынчынты нымæц у 21 мин адæймагæй фылдæр. Бæлвырддæр хабæрттæ радзурдзæн Фидараты Маринæ.
Диабеты скъолайы къорды бæлвырд базонæн ис сойы, урсæджы æмæ углеводты тыххæй информаци. Лейла Хокришвили ахæм ахуырты ис фыццаг хатт. Сæкæрниз æм раиртæстой 15 азы размæ. Ацы низ ын у æрдзæй рахæсгæ. Йæхæдæг куыд зæгъы, афтæмæй йын ахæм ахуырты архайгæйæ фадат ис æххæстæй цæрынæн, æнæ уæлдай цæлхдуртæй.
Дохтыртæ зæгъынц, цæмæй сæкæрнизимæ æнæ къуылымпытæй цæрай, уый тыххæй хъæуынц сæрмагонд ахуыртæ. Уым базонæн ис куыд низы тыххæй, афтæ йæ дзæбæх кæныны мадзæлтты тыххæй дæр. Пациенттæн радзурынц, химæ куыд зилын хъæуы, сæкæры æмвæзад, хæдзары уæвгæйæ, куыд сбарæн ис, стæй низы фæстиуджыты профилактикæйыл куыд архайын хъæуы, уый. Æдæппæтæй 9 ахуырмæ базонынц фылдæр хабæрттæ. Райдай раст хойрæгтæй æмæ, сæкæры æмвæзад куы рхауы, уæд фыццаджыдæр цы бакæнын хъæуы, уымæй фæуы.
Сæкæрнизæй рынчын адæм стационары сæхи дзæбæх кæнынц афæдз иу хатт. Инсулинмæ чи рахизы, уыдон та ацæуынц уæлæмхасæн ахуырад. Уымæй дарддæр дохтыртæ кæсынц, низ йæхи дарддæр куыд дары, уымæ. Консультацитæ скæнынц окулист, невролог, кардиолог, гинеколог, нефролог. Кусы сæрмагонд кабинет, диабетическая стопа, кæй хонынц, уый.
Сæкæрниз нымад у 21-æм æнусы æнæинфекцион пандемияйыл. Республикæйы эндокринологон диспансеры бæрæггæнæнтæм гæсгæ, æдæппæтæй диабетæй рынчынты нымæц у 21 мин адæймагæй фылдæр, стæй 285 сты сывæллæттæ. Пандемияйы фæстæ сæкæрнизæй рынчынтæ дзæвгар фæфылдæр сты.
