филиал вгтрк государственная телерадиовещательная компания “Алания”

Дунейы зындгонд францусаг философ, фыссæг, ахуыргонд Оскар Бренифье ссыд Дзæуджыхъæумæ æмæ фембæлд республикæйы хицауады сæрдар Такъоты Сергеимæ, ахуырады æмæ наукæйы министр Огъуаты Аланимæ, стæй туризмы, амалхъомдзинады æмæ инвестицион политикæйы министр Диамбегты Аланимæ. ЮНЕСКОйы эксперт радзырдта йæ куысты тыххæй, балæвар сын кодта йæ чингуытæ уырыссаг æвзагмæ тæлмацгондæй. Уæрæсейы йын мыхуыры рацыд 15 куысты. Республикæйы хицауады сæрдар Такъоты Сергейы ныхæстæм гæсгæ, Оскар Бренифье Цæгат Ирыстонмæ кæй ссыд, уый нымайæн ис æмгуыстады фыццаг къахдзæфыл.

Национ наукон библиотекæйы йын цы фембæлд сарæзтой, уый стыр цымыдисдзинад сæвзæрын кодта фæсивæдмæ. Бренифье у практикон философийы институты бындурæвæрæг, семинартæ æмæ тренингтæ аразы æппæт дунейы. Цæгат Ирыстоны фæуыдзæн 5 боны æмæ семинартæ сараздзæн куыд ахуыргæнджытæн, афтæ ныййарджытæн дæр.

Ацы балц арæзт æрцыд студи «Урувелла»-йы хъæппæрисæй проект «Ахсджиаг фембæлд» æххæстгæнгæйæ. Проекты нысан у республикæйы цæрджытæн дунейы зындгонд адæмимæ æмбæлынæн фадæттæ аразын.