2028-æм азмæ фæнд кæнынц сæнæфсиры æмæ уымæй продукттæ цæттæгæнæн æххæст цикл скæнын
«Монарх», «Совиньон-блан», «Шардоне». Дунейы зындгонд сæнæфсиры хуызтæ ныр зайын кæнынц Мæздæджы районы дæр. Ацы куыст цы хæдзарад кæны, уый азæй-азмæ уæрæхдæр кæны. 2028-æм азмæ фæнд кæнынц сæнæфсиры æмæ уымæй продукттæ цæттæгæнæн æххæст цикл скæнын. Бæлвырддæр радзурдзæн Хъайтмазты Дзерассæ.
300 гектары бæрц фæзуаты ныссагъдтой 8 техникон хæрзмыггаджы хуызы. Бынæттон климæт иттæг хорз бæззы сæнæфсирæн, зæгъы агроном Занкисты Виталий. Ацы гагадыргъ Мæздæджы районы ахадгæйæ зайын кодтой Советон рæстæг. Бирæ хур бонты фæрцы сæнæфсиры равзæры сæкæр.
Сæнæфсиры фыццаг къутæртæ ам ныссагъдтой фарон – 52 мин талайæ фылдæр. Хæдзарад сындæггай уæрæхдæр кæны. Фæззæджы ма фæнд кæнынц гагадыргъ ноджыдæр 110 гектарыл ныссадзын.
Сæнæфсир æнцондарæн культурæ нæу. Хъæуы йæ бирæ дон æмæ уымæлад. Хæдзарады ныридæгæн лыг кæнынц, гагадыргъ æдзух пырх кæнынæн уавæртæ саразыны фарста. Уый тыххæй ам къахынц аразгæ цад. Фæвæййы æртахгай донхорыггæнæн системæйы монтаж.
Мæздæджы районы сæнæфсиры хæдзарад у стыр инвестицион проект. Паддзахадон субсидиты фæрцы хæрдзты хай баххæст кæнынæн радих кодтой 110 милуан сомы. Фидæны ам фæнд кæнынц сæнæфсирыл фыццаг кæм бакусынц, ахæм цех саразын. Уый руаджы районы фæфылдæр уыдзысты куысты бынæттæ.
Генералон директор Багаты Генрих ма фæнд кæны сазарын сæн цæттæгæнæн завод. Афтæмæй бантысдзæн афæдзмæ 20 милуан бутылкæйы уадзын.
