Олегæн йæ цард аскъуыд, æфсæддон хæс æххæстгæнгæйæ, сæрмагонд æфсæддон операцийы зонæйы
Дур-Дуры Сагкаты Оледжы номыл 1-æм скъолайы байгом кодтой мемориалон фæйнæг. Олегæн йæ цард аскъуыд, æфсæддон хæс æххæстгæнгæйæ, сæрмагонд æфсæддон операцийы зонæйы. Олег уыд 2-æм скъолайы рауагъдон. Фæлæ хъæбатыр хæстон йæхæдæг цы ахуыргæнæндон каст фæци, уый ныртæккæ реконструкцигонд цæуы. Уымæ гæсгæ 1-æм скъолайы разамынд бауынаффæ кодтой мемориалон фæйнæг сæ ахуыргæнæндоны байгом кæнын. Олег адæмы уарзта, æмæ йæ уыдоны фарн дæр уыд. Æдзухдæр цæттæ уыд, æххуысхъуаг адæймаджы фарсмæ æрбалæууынмæ. Йæ бинонтæн: йæ ныййарджытæн æмæ хотæн уыд стыр ныфс. Йæ фыд Руслан æмæ йæ мад Альбинæ схъомыл кодтой зæрдæхæлар адæймаджы, патриоты. Олег сабырдзинадæн снывонд кодта йæ цард. Хъæбатыр хæстон хорзæхгонд æрцыд паддзахадон хæрзиуджытæй. Мадзалмæ æрбацыдысты Дыгуры районы хицауады уæнгтæ, хъæуы цæрджытæ, хæстæджытæ, æрыгон фæлтæры минæвæрттæ, адæмон фронты волонтертæ, сæрмагонд æфсæддон операцийы ветерантæ, Оледжы чи зыдта, æмæ йын стыр аргъ чи кодта, уыцы адæм.
