Аудындзинад фылдæр кæй хъæуы, уыдоны хсæн сты сидзæр сывæллæтты хæдзæртты хъомылгæнинæгтæ. Дур-Дуры сывæллæтты хæдзар «Надеждæ»- йы сабитæн ацы бонты арæзт æрцыд æцæг бæрæгбон.
Сидзæрты профилактикæйы центр «Мæ бинонтæ» æмæ Дзæуджыхъæуы администраци сын баластой зæрдылдарæн лæвæрттæ: уæлæдарæс, техникæ, дыргътæ æмæ халсартæ. Ахуыргæнæндоны директор куыд загъта, афтæмæй цух ницæмæй æййафынц, фæлæ сын ахæм ахастдзинæдтæ тынг æхсызгон сты. Сæйраг лæвар та сывæллæттæн уыд цымыдисаг концерт. Сæ уарзон зарджытæ сын акодтой Дауыраты Эдуард, Тайсауты Олег, Хъæбæлоты Руслан, Никита Васильев, Быгъуылты Георгий æмæ иннæтæ. Фысымтæ дæр сæхи сæрæнæй равдыстой. Акафыдысты сæ уарзон кæфтытæ. Ацы бæрæгбон арæзт æрцыд, муниципалон программæ «Горæт хъæуæн» æххæст кæнгæйæ. Лæвæрттæ та сын балхæдтой цæгæтирыстойнаг амалхъом адæм.
Мæхæмæтты Галинæ, Дур-Дуры сидзæр сывæллæтты хæдзары директор: «Ам махмæ ис ахæм сывæллæттæ æмæ бынтондæр æнæ ныййарджытæй чи баззад. Æмæ сын ахæм бæрæгбæттæ кæй саразынц, уый хорз у. Сывæллæтæн æхсызгон вæййы. Зæрдиагæй фæцин кæнынц, базонгæ вæййынц артисттимæ. Бæргæ, сидзæр сывæллæттæ куы нæ уаид. Фæлæ кæд æмæ ис ахæм фæзынд, уæд бузныг сæ цæст сæм чи дары æмæ сæ чи нæ рох кæны, уыдонæн».
