Гом арвы бын комы равæрдтой 10 скульптурæйæ фылдæр
Дыгургомы байгом скульптор Соскиты Владимиры равдыст. Гом арвы бын комы равæрдтой 10 скульптурæйæ фылдæр. Сеппæт дæр сластой Мæскуыйæ, Владимиры æрмадзæй. Йæхæдæг куыд зæгъы, афтæмæй йын тынг ахсджиаг у йæ куыстытæ йæ райгуырæн хъæуы. Хъæдæй æмæ дурæй конд скульптурæтæ хорз сфидыдтой æрдзы хъæбысы. Цæмæн дзы уæлдай аргъ кæны зындгонд скульптор æмæ цы æнкъарæнтæ сæвзæрын кодта адæмы зæрдæты.
Бузойты Артем у Соскиты Владимиры хорз хæлар æмæ хъуыды кæны, скульпторы фыццаг къахдзæфтæ аивады. Хъысмæты цæлхдуртæ æмæ царды æвзарæнтæ ирд разындысты йæ сфæлдыстады. Уый тыххæй йын ацы равдыст у уæлдай зынаргъ æмæ ахсджиаг.
Дæс скультурæйæ фылдæр хорз сфидауын кодтой арвы бын галерея. Æрбаластой сæ Мæскуыйæ, Соскиты Владимиры æрмадзæй. Нывгæнæг куыд зæгъы, афтæмæй сæххæст йæ рагон бæллиц — йæ уацмыстæ равæрдтой йæ райгуырæн хъæуы. Скульптор йæ сфæлдыстадæй арфæ кæны йæ фыдæлты зæххæн.
Хохы Ногхъæумæ ссæуын се нцонтæй нæу. Бирæ батухæн кæнын ыл хъæуы. Ахæм зын æмæ гуыргъахъхъ уыдис скульпторы цардвæндаг дæр. Равдыст нывондæн хæссы сæ удыхъæд фидар кæмæн у, уыцы адæмæн. Соскийы-фырты сфæлдыстад кæй туджы ахъардзæн æмæ дзы хæларæй чи саходдзæн, уыдонæн. Дурын æмæ хъæдын скульптурæтæ цыма рагæй дæр ам уыдысты, афтæ сфидыдтой.
Равдысты уазджытæн сæ фылдæр сты нæ бæстæйы æндæр регионтæй. Сæ фиппаинагмæ гæсгæ скульптор хорз æвдисы адæмы æнкъарæнтæ. Соскиты Владимиры куыстытыл иу хаттæн аххæссæн нæй. Алы адæймагæн дæр ис бар скульпторæйы мидисыл хицæнæй ахъуыды кæнынæн. Йесо Чырыстийы райгуырд иутæн у дуджы нысан, иннæтæн та Хуыцауы фæзынд.
Соскиты Владимир архайы псевдопримитивизмы къабазы. Уымæн та хъæуы стыр дæсныдзинад. Фыццаг бакастæй хуымæтæг фæлгонцтæ хъуамæ аивадуарзæг айса куыд æмбал кæмæн нæй, ахæмтæ. Йæ куыстытæ адæймагæн халын кæнынц йæ миддуне æмæ йæ сыгъдæгдæр æнкъарæнтæ. Фæлæ скульпторы æппæт куыстытимæ ирон аивадуарзæг разы нæу. Æвæццæгæн, уый тыххæй уæззау хæххон фæндагыл равдыст фенынмæ рараст уыдзысты æрмæстдæр нывгæнæджы миддуне чи банкъара, уыцы адæм.
Скульптурæты æхсæн уæлдай бынат ахсы нывгæнæджы фыды сурæт. Уый фæмард ис фыдыбæстæйы стыр хæсты рæстæг. Фыд æмæ фырт кæрæдзийы никуы федтой. Æстай азы фæстæ Соскиты Владимир йæ фыды æрыздæхта йæ рагфыдæлты зæххмæ æрмæст дуры хуызы.
Йæхи номыл та йæ æртхорд Къибирты Амырхан ныффста æмдзæвгæ
Равдыст уыдзæнис фенæн фыццæгæм октябырмæ.
