Кæстæртæ сæхæдæг æрхъуыды кæнынц сценаритæ, бахуыйынц уæлæдарæс, гастролты ацæуынц республикæйы хъæутæм
Актеры дæсныйад, экологон æдасдзинад хынцгæйæ. Дыгуры районы æвзонг натуралистты станцæйы кусы сывæллæтты экологон театр. Кæстæртæ сæхæдæг æрхъуыды кæнынц сценаритæ, бахуыйынц уæлæдарæс, гастролты ацæуынц республикæйы хъæутæм. Фæлæ сæйрагдæр – сæ дæнцæгæй æмæ постановкæтæй курынц адæмæй, цæмæй хъæхъхъæной алфамблайы æрдз. Сывæллæтты зæрдиаг куыстæн æвдисæн уыд не сфæлдыстадон къорд. Ныхасы бар Сосранты Жанннæйæн.
Дигорайы сывæллæтты экологон театры репетици ис йæ тæмæны. Сывæллæттæ канд актеры дæсныйадыл нæ ахуыр кæнынц, фæлæ сæ æмхиц кæнынц алфамбылайы дуне уарзынмæ спектаклы уылты. Сæ радон постановкæ «Али-баба æмæ 40 æрдз хъахъхъæнæджы».
Дыгуры районы натуралистты станцæйы ахуыргæнæг Елбайты Агнессæмæ экологон театр саразыны хъуыды æрцыд 2018 азы. Репетицитæ кæнынæн сын актон зал радта æртыккæгæм скъола, сæ ахуырдзаутæ та дзы архайынц активонæй. Зæгъын хъæуы уый, æмæ сценаритæ Агнессæ йæхæдæг кæй фыссы, уый.
Фарон экотеатры архайджытæ адæмы размæ рахастой 4 спектаклы. Ацы театры æдзухдæр хæлардзинад фæуæлахиз вæййы æвзæрдзинадыл, æрдз та ирвæзт æрцæуы.
Фарон хæдахуыр актертæ сæвæрдтой индейаг элементтимæ постановка, ацы хатт та – индиагтимæ. Хореографи дæр у æнæмæнг хъуыддаг театры. Елбайты Агнессæ æппæт хъуыддæгты дæр архайы активонæй.
Ацы къорды сæхи хъарутæй алцыдыр бацæттæ кæнынц спектакльтæм. Костюмтæ æмæ æппæт хъæугæ æрмæг æрæмбырд кæнынц иумæ. Декорацитæ саразынмæ та сын феххуыс кодта 3-æм скъолайы фæллойы ахуыргæнæг, бынæттæон нывгæнджытæ та сын баххуыс кодтой сценæ саив кæнынмæ.
Дыгуры районы æвзонг натуралистты станцæ кусы 1988 азæй фæстæмæ. Архайы дзы 600 сывæллонæй фылдæр æртæ къабазмæ гæсгæ – экологон, биологон, стæй ма дзы ахуыр кæнынц шахматтæй хъазын дæр.
Сфæлдыстадон къабæзты педагогтæ сывæллæттимæ кусынц æппынæдзухдæр. Ацæуынц экскурситæм, аразынц æрдзон æрмæгæй алыхуызон дзаумæттæ.
Æвзонг натуралистты станцæйы ахуыргæнджытæ алыхуызы мадзæлтты фæрцы сывæллæттæм гуырын кæнынц алфамбылайы дунемæ наукон цымыдисдзинад æмæ уарзондзинад. Æмбарынц æй, фидæн уыдонимæ баст кæй у, уый.
