Æмбырд кæнынц сезоны культурæтæ, техникæ быдырты кусы райсомæй изæрмæ
Дыгуры районы ахадгæйæ цæуы тыллæг æфснайæн кампани. Æмбырд кæнынц сезоны культурæтæ, техникæ быдырты кусы райсомæй изæрмæ. Аграриты ныхæстæм гæсгæ, кæд боныхъæды уавæртæ зæрдæмæдзæугæ нæ уыдысты, уæддæр нырыккон гæнæнты фæрцы бантыст хорты фылдæр хай бахъахъхъæнын. Бæлвырддæр радзурдзæн Хъайтмазты Дзерассæ.
Комбайнтæ иу иннæйы фæдыл цæуынц быдыры, нæмгуытæ æфсиртæй хицæн кæнгæйæ. Дыгуры районы йæ тæмæны фæззыгæнд мæнæу æфснайыны рæстæг. Быдырты кусын райдыдтой къуырийы размæ. Ам хъæуы бафснайын 1 400 гектары. Ныртæккæ уыцы иу рæстæг кусынц цалдæр комбайны. Аграритæ куыд зæгъынц, афтæмæй сæ боныхъæд æххæст тыхæй кусын нæ уадзы.
Цалынмæ техникæ быдыры кусы, уæдмæ аграритæ аргъ кæнынц фыццаг хатдзæгтæн. Рæстæмбис иу гектарæй ацы аз æнтысы сисын 4-5 тоннæйы бæрц хор. Ацы сезонæн уый хорз бæрæггæнæныл нымад у. Уалдзæг æмæ сæрды райдиан хуымæтæг нæ уыдысты – къæвдатæ æмæ уазал рæстæг. Фæлæ нырыккон гæнæнтæ баххуыс кодтой хортæ бахъахъхъæнын æмæ райсын хорз тыллæг. æдæппæтæй Дыгуры районы ис 16 мин гектары бæрц хуымгæнæн зæххытæ.
Мæнæуы фæстæ зæхкусджытæ рахиздзысты нартхор æфснайынмæ. Ацы культурæ ахсы быдырты фылдæр хай. 700 гектары бæрц та – хурмæзилæг. æфснайын æй фæнд кæнынц сентябры кæрон.
