Дзæуджыхъæуы велосипедисттæн арæзт æрцæудзæн æппæт фадæттæ дæр, цæмæй сæ бон уа спорты ацы хуызæй пайда кæнын. Дзæуджыхъæуы 230 азы бонмæ горæты администрацийы уыд пресс-конференци.
Фыццаджыдæр ныхас цыд, терренкур арæзт кæй æрцæудзæн, ууыл. Конд уыдзæн дендрарийы хуызы. Фæлæ дзы фылдæр фадæттæ уыдзæн велосипедтыл дугъ кæнынæн. Велосипедистты æхсæнад æмæ горæты разамынд иумæ бакуыстой йæ маршрутыл. Цæудзæн Пожарскийы хидæй – дендрарийы онг, йæ дæргъ уыдзæн 40 км. Адæмы æнцойдзинадæн маршрутыл кусдзæн велосипедтæ, веломобильтæ, цæлхытыл къахдзоныгътæ рæстæгмæ райсæн кæм уыдзæн, ахæм 6 пункты. Иу ран сæ уыдзæн райсæн, иннæ ран та фæстæмæ раттæн.
Апрелы уал байгом уыдзæн 2 пункты: фæлладуадзæн парчы æмæ Цæнгæт хиды цур. Скодтой сын сæрмагонд фæндæгтæ. Ныр спортуарзджытæн сæ бон уыдзæн дугъ кæнын æнæкъуылымпыйæ æмæ фæнгаггон æгъдæуттæ нæ халгæйæ.
Дзæуджыхъæуы администраци расидт конкурс, паркæн иронау хуыздæр ном æрхъуыды кæнынæн. Нарты кадджытæм гæсгæ дзы æвæрд æрцæудзæн 12 скульптурæйы.
Пресс-конференцийы ма æрдзырдтой, апрелы цъæх фæлысты мæйон куы райдайа, уæд горæты аивдзинад æмæ сыгъдæгдзинадæн цавæр куыстытæ бакæнын хъæудзæн, ууыл.
Парчы фæзуат банывыл кæнынæн горæты администраци фæсидт куыстуæттæм æмæ организацитæм. Ныртæккæ 60 организацийы бæрц разы сты сæхи фæрæзтæй йæ бафснайыныл. Уымæ гæсгæ парчы фæзуат дихгонд æрцыд сектортыл, алкæмæн дæр дзуапп дæтдзæн бæлвырд организаци кæнæ куыстуат.
