Сæ хъуыдымæ гæсгæ баннертæ æмæ рекламон фæйнæджытæ, фыццаджыдæр, хъуамæ дзуапп дæттой ирон адæмы домæнтæн. Уый тыххæй горæты уынгтæ æрвылмæй бæрæг кæндзæн сæрмагонд къамис.
Æрыгон чызджы фæлгонц хурыскæсæйнаг уæлæдарæсы кафейы къулыл. Дзæуджыхъæуы æхсæнадон советы минæвар Цæллагты Викторы хъуыдымæ гæсгæ ахæм нывтæн горæты уынгты уæвæн нæй. Ирон менталитеты домæнтæн дзуапп нæ дæттынц.
Дзæуджыхъæуы администрацийы рекламæйы хайады специалисттæ æдзух кусынц ацы фарстайыл. Куыд зæгъынц, афтæмæй фæстаг рæстæг уавæр хуыздæрырдæм аивта. Бантыст сын стыр рекламон агентадтимæ баныхас кæнын. Ныр горæты рекламон конструкцитыл нал фендзынæ æнæуаг сылгоймæгты фæлгонцтæ.
Æнæуаг рекламæмæ æдзухдæр стыр æргом здахы горæты разамынд. Уый тыххæй арæзт æрцыд сæрмагонд кусæг къорд. Бабар ын кодтой æрвылмæй рейдтæ аразын, æмæ ахæм рекламæ кæм ис, уыцы бынæттæ бæлвырд кæнын. Къорды уæнгтæ фембæлдысты рекламон агентадты разамонджытимæ. Ныхас цыд, æнæуаг фæлгонцтæ кæй дуканиты къултыл æмæ рудзгуытыл ис, уыдоны хицæутты алы хуызы æфхæрын кæй хъæуы, уый тыххæй. Зæгъæм, агентадты разамонджытæн загътой, цæмæй ахæм заказтæ ма исой. Фæлæ уыдон куыд бамбарын кодтой, афтæмæй сын закъонмæ гæсгæ ахæм бар нæй. Рекламæйы федералон закъоны дæр бæлвырд фыст нæй, æнæуагыл цавæр рекламæ нымад у, уый.
Екатерина Дмитриева, федералон антимонополон службæйы цæгатирыстойнаг хайады управленийы сæйраг специалист-эксперт: «Рекламæйы федералон закъоны 6-æм хайы 5-æм статьяйы фыст ис, рекламæйы кæй нæй пайда кæнæн загъды ныхæстæй, æнæуаг фæлгонцтæй, адæймаджы кар æмæ наци чи æфхæры, ахæм дзырдтæй. Уый дзуры, æнæуаг рекламæйæн бæлвырд бæрæггæнæн кæй нæй, ууыл».
Рекламæйы мидис цавæр хъуамæ уа æмæ йæм йæ цæст чи дара, уый сбæрæг кæнын æнцон нæу. Æмтгæй райсгæйæ, уынгты цы рекламæ ис, уымæ йæ цæст дарынц антимонополон оргæнтæ. Дуканиты вывескæтæн дзуапп дæтты горæты администраци. Фæлæ сæ къултыл æмæ рудзгуытыл цы æрмæг ис, уый бæлвырд кæнын кæмæ хауы, уыцы хъуыддаг закъоны фыст нæй. Афтæмæй ацы фарстайæн бæлвырд дзуапп радтын никæмæн у йæ бон.
Хъайтмазты Дзерассæ
