Республикæйæн дæсны специалисттæ цæттæ кæныны æмæ адæмон хæдзарад кусæг адæмæй ифтонг кæныны хæс йæ размæ æвæры Дзæуджыхъæуы 7-æм профессионалон техникон училищæ.
Дзæуджыхъæуы 7-æм профессионалон техникон училищæйы фæзынди фæсивæдæн нырыккон кусæн æрмæджы фæрцы сæ дæсныйады фæлтæрддзинад райсынæн æххуыс чи уыдзæн, ахæм ног фадæттæ. Ахуыргæнæндæтты техникон бындур рæзын кæныны программæ æххæст кæнгæйæ дзы арæзт æрцыд республикæйы æмбал кæмæн нæй, ахæм автодром, балхæдтой рог æмæ уæззау машинæтæ, ногтæй раивтой компьютерон кълæстæ. Фæзынди сæм ахуыргæнæн тренажертæ дæр. Хæстæгдæр рæстæг та фæнд кæнынц, спутникон системæ ГЛОНАСС сæвæрын, ацы хъуыддаджы фæдыл ныридæгæн бафыстой бадзырд. Ацы ногдзинæдтæ цардырауадзын сын бантыст федералон программæмæ гæсгæ сæ проекты фæрцы.
Цæголты Тамерлан – 7-æм профессионалон училищæйы директор: «Мах иннæтæй хицæн кæнæм уымæй, æмæ нæм ис бирæ дæсныйæдтæ. Кæй зæгъын æй хъæуы, уый æнцон хъуыддаг нæу, фæлæ дзы стæм сæрбæрзонд. Мах нæ размæ вæрд хæстæ иууылдæр æххæст кæнæм æххæст кæнæм куыд æмбæлы, афтæ».
Училищæ техникон цæттæдзинад ныр у, æмбæлгæ уавæры. 4 ахуырдзауæн дзы 1 компьютер. Алы 30 – нæн та интерактивон фæйнæг. Уый та фадат дæтты æрмæст нæ республикæйæн нæй, фæлæ æппæт Уæрæсейæн дæр хæрзхъæд специалисттæ цæттæ кæнынæн. Ахуырдзаутæн дзы ис тынг хорз уавæртæ. Æмдзæрæны цæрынц лæвар.
Кочиты Аслан у, фидæны æндадзæг. 7-æм училищæмæ ахуыр кæнынмæ бацыд йæ æфсымæры фæндонмæ гæсгæ. Асланы уырны, ахуыр куы фæуа, уæд ын куыст ссарын зын нæ уыдзæн. Йæ равзæрст дæсныйадыл фæсмон нæ кæны, ныр дæр ын уæгъд рæстæг куы вæйы, уæд фæкусы æндадзæн цехы.
Кочиты Аслан: «9-æм кълас каст куы фæдæн, уæд æрбацыдтæн ардæм æндадзæджы дæсныйад райсынмæ. Уымæн æмæ йæ зыдтон кæд фæнды дæр куыст ссардзынæн, уый. Фæнды мæ хорз специалист суæвын. Æмæ йыл архайын».
Директор Цæголты Тамерланы ныхæстæм гæсгæ, æнгом æмгуыстад кæнынц адæмæн куыст дæттыны центримæ. Сæ фæндонмæ гæсгæ бацæттæ кодтой 200 æндадзæджы. Ацы дæсныйады специалисттæ нæ республикæйы фаг нæ уыди.
Училищæйы рауагъдонты агурынц æрмæст нæ республикæйы нæ, фæлæ Цæгат Кавказы регионы дæр. Алы аз дæр ахуыргæнæндон каст фæвæййы 500 специалисты. Уымæ гæсгæ адæмон хæдзарады кусæг адæмæй цух хъуамæ ма уа.
