Бæлвырддæр та – Сабырдзинады Проспекты машинæтæй чи цæуы, уыцы шофырты. Проспекты æвæрд ис сæрмагонд бырутæ æмæ цыргъæгтæ, фæлæ сæ уыдон дæр нæ уромынц.
Паддзахадон автоинспекцийы кусджытæ сын байсынц сæ гæххæттытæ, уæддæр закъонхалджытæ сæ кæнон нæ уадзынц.
Горæты цæрджытæ сабыргай тезгъо кæнынц Проспекты. Зæрдæмæдзæугæ музыкæйы зæлтæ æмæ рагон горæты рæсугъд нывæфтыдтæ хатгай фæкъуылымпы кæны машинæйы моторы хъæр. Езеты Ханиффæ æрхæндæг зæрдæйы ахастимæ мысы кæддæр Сабырдзинады Проспекты æрмæстдæр трамвайтæ куы цыдысты, уыцы рæстæг.
Езеты Ханиффæ, Сабырдзинады Проспекты хæдзæрттæй иуы цæрæг: «Æнæуи адæмы дæр хъыгдарынц. Сывæллонджын ныййарджытæ нал уæндынц сæ сабитимæ рацæуын. Тæрсынц, машинæ сын сæ куы скъуыра, уымæй».
Ныртæккæ Проспекты фенæн ис æфсæйнаг цыргъæгтæ æмæ сæрмагонд бырутæ. Горæты цæрджытæм ногдзинадмæ иухуызон цæстæнгас нæ уæй. Журналист Цыхуырбаты Алан йæ уацхъуыдты ацы темæйыл иу æмæ дыууæ хатты нæ дзырдта. Йæ хъуыдымæ гæсгæ, закъонхалджытимæ ахæм хуызы тох ахадгæ нæу, уый иу, стæй æвидауц кæны горæты сæйраг уынг.
Цхуырбаты Алан, журналист: «Ацы ногдзинады автортæ сæхæдæг дæр сæхи æруагътой, Проспекты машинæйæ чи цæуы, уыцы шофырты æмвæзадмæ. Мæнмæ гæсгæ, ахæм хуызы тох раст нæу. Хуыздæр уаид, ивар сæ куы кæниккой, уæд. Иу цалдæр хатты шофыр иваргонд куы баййафа, уæд æй бамбардзæн».
Проспекты чи цæры, уыдоны горæты администраци сифтонг кодта пультытæй. Иннæтæ та, сæ машинæтæ хъуамæ æвæрой хæстæгдæр уынгты æмбæлгæ бынæтты. Фæлæ бирæтæ фистæгæй иу чысыл ацæуыныл дæр разы не сты.
Фистæгæй цæуæн зонæйыл машинæйæ баскъæрын бирæ шофыртæм ницы кæсы. Афтæмæй халынц фæтк.
Дзæуджыхъæуы администрацийы куыд зæгъынц, афтæмæй ахæм æнæрхъуыды адæмимæ тох кæнынæн æндæр мадзал нæй. Куыд нысан кæнынц, афтæмæй горæты парк æмæ Сабырдзинады Проспектæн хъуамæ уа иу тезгъо кæнæн зонæ, уырдæм та машинæтæн цыфæндыйæдæр бацæуæн нæ уыдзæн.
Раст зæгъгæйæ, фæлладуадзæн бынаты патрулон машинæ нæ фидауы. «Фæлæ Дзæуджыхъæуы æндæр гæнæн нæй»,- зæгъынц, автоинспекцийы кусджытæ. Арæх сæ рейдтæ скæнын бахъæуы Проспекты æмæ хæстæг уынгты.
Алан Сабаури, Паддзахадон автоинспекцийы батальоны командиры хæдивæг: «Чи не `мбары, уыдонимæ тох кæнæм. Сæ гæххæттытæ сын исæм, æфхæрæм сæ, цæмæй закъон ма халой, уый тыххæй».
Фистæгæй цæуæн зонæмæ машинæйæ бацæуыны тыххæй шофырæн йæ бон баззайын у æнæ бардæттæг гæххæттæй. Фæлæ бирæтæ уæддæр ахæм рæдыдтытæ æруадзынц. Æрмæстдæр Паддзахадон автоинспекцийы карздæр æфхæрдæй ныууаддзысты закъонхалджытæ се нæуаг митæ.
