филиал вгтрк государственная телерадиовещательная компания “Алания”

Дзæуджыхъæуы аэропорты тæхæн-бадæн рæгътыл цæуы реконструкци. Нæртæккæ дзы куыстытæ кæронмæ фæхæццæ кæнынц сæ иуы. Куыстытæ конд цæуынц изæры æмæ æхсæвыгон, хæдтæхджытæ куы нал фæтæхынц, уæд. Афтæмæй хъыгдард нæ цæуы «радиомаячная техникæ» кæй хонынц, уый. 

Аэропорты разамынды ныхæстæм гæсгæ, ивд æрцæудзæн тæхæн æмæ бадæн рæгъты уæлцъар иууылдæр. Куыстытæ конд цæуынд ног технологитæм æмæ домæнтæм гæсгæ. Ног уæлцъар та æвæрд цæудзæн 3 цъарæй. Афтæмæй йæ хæрзхъæддзинад уыдзæн бирæ хуыздæр. 

Асфальтбетон уæлцъар зæрдæмæдзæугæ кæй нæу, уымæ гæсгæ ныртæккæ уæззау хæдтæхджыты сбадын кæнынц цал бынаты дзы ис, уымæй къаддæр. Реконструкцийы фæстæ та уыдзæн фидардæр æмæ аэропорты уæй кæндзысты билеттæ. Уымæй уæлдай фæзындзысты ног маршруттæ. Фæасламдæр уыдзысты билетты æргътæ. Уый та бæлццæттæн у ахсджиаг фарста. 

Уæвгæ йæ алчидæр зоны Дзæуджыхъæуы аэропорты æргътæ Цæгат Кавказы зылды сты æппæтæй зынаргъдæр. Сæрдыгон дзы бонмæ вæййы æрмæстдæр 3 фæткмæ гæсгæ 3 та чартерон рейстæ. Æмæ аэропорты билеты æргътæ дæр уымæн бæрзонд сты. 

14-æм сентябры аэропорт мæйы æмгъуыдмæ сæхгæндзысты. Æппæт рейстæ дæр цæудзысты Минводæй, Налцыккæй кæнæ Магасæй. Уæдмæ та сæвæрдзысты ног цырæгътæй сигналгæнæн кусæнæгæрзтæ. Уæд æвзæр æрдзон уавæрты тыххæй хæдтæхджытæ нал хъæудзæн æрвитын иннæ аэропорттæм. Уымæй уæлдай ма дзы федералон программæйы домæнтæм гæсгæ æвæрд æрцæудзысты видеоцæстдарды, æдасдзинады æмæ сигнализацийы ног системæтæ.