«Дунейæн балæвар кæнæм уды музыкæ». Ахæм сæргондимæ Дзæуджыхъæуы арæзт æрцыд классикон музыкæйы фестиваль. 5 боны дæргъы аивадуарзджытæн фадат уыдзæн классикон музыкæйы 7 концерты фехъусынæн.
«Дунейæн балæвар кæнæм уды музыкæ». Ахæм сæргондимæ Дзæуджыхъæуы арæзт æрцыд классикон музыкæйы фестиваль. 5 боны дæргъы аивадуарзджытæн фадат уыдзæн классикон музыкæйы 7 концерты фехъусынæн. Æрыгон музыканттимæ фестивалы архайынц зынгонд хъисфæндырæй цæгъдджытæ, пианисттæ æмæ дирижертæ. Ныхасы бар нæ уацхæссæг Гукаты Иринæйæн. Классикон музыкæйы фестиваль Дзæуджыхъæуы райдыдта зындгонд композитор Антонио Вивальдийы уацмыстæй. Цæгат Ирыстоны паддзахадон филармонийы оркестрæн разымынд лæвæрдта хъуыстгонд дирижер æмæ пианист, æппæтадæмон конкурсты лауреат, Петр Чайковскийы номыл Мæскуыйы паддзахадон консерваторийы ахуыргæнæг Константин Маслюк. Уæвгæ, музыкант Дзæуджыхъæуы ацы фестивалы архайы ныр 4-æм хатт. Куыд зæгъы, афтæмæй ам, Ирыстоны ис бирæ професиионалтæ, классикон музыкæйæн стыр аргъ чи кæны, ахæмтæ. Паддзахадон филармонийы оркестримæ иумæ сæ арæхтсдзинад æвдыстой Дзæуджыхъæуы 1-æм музыкалон скъолайы рауагъдонтæ, ныртæккæ та Альфред Шниткейы номыл Мæскуыйы музыкæйы паддзахадон институты студенттæ, Елизавета Пушкарева æмæ Тедеты Тамерлан. Уыдонимæ ма сæйраг партитæ ацагътой Петр Чайковскийы номыл Мæскуыйы паддзахадон консерваторийы студент Николай Цинман, стæй æппæтадæмон конкурсты лауреат Хан Ын Чжу, Къарейæ.
Æппæтадæмон фестивалы сæйраг нысан у æрыгон музыкантты сфæлдыстадон авналæнтæ уæрæхдæр кæнын æмæ сæ бæрзæндтæм хизынмæ разæнгард кæнын, семæ фестивалы цы зындгон музыканттæ архайы, уыдоны хуызæн.
Фестиваль арæзт æрцыд Дзæуджыхъæуы разамынды æмæ Петр Чайковскийы номыл музыкалон скъолайы хъæппæрисæй. Æмæ кæд фыццаг аз фестивалы архайдта æрмæстдæр 20 музыканты, уæд ныр сæ нымæц æртæ хатты фæфылдæр. Зæгъын хъæуы уый, æмæ нæ республикæйы æрыгон музыканттимæ иумæ концертты архайдзысты Невинномысскы æмæ Пятигоскы музыкалон скъолаты ахуырдзаутæ дæр.
Фестивалы архайджыты хсæн ис зындгонд музыкант Австрийæ Луц Лесковиц дæр. Ацæгъддзæн Антонио Страдиварийы скрипкæйыл – конд у 1707-æм азы. Уыимæ ма аивадурзджытæ фехъусдзысты джазы концерт дæр.
Дзæуджыхъæуы ацы фестиваль арæзт цæуы ныр 4-æм хатт. Се сфæлдыстадæй фестивалы архайджытæ ирон аивадуарзджыты буц кæндзысты æнæхъæн къуыри – æвдыст æрцæудзæн классикон музыкæйы 7 концерты.
