Ацы цауимæ баст уыд, республикæйы фыццаг мини-гольфы фæз кæй байгом, уый дæр. Ерысты архайдтой 25 спортсмены Мæскуыйæ, Санкт-Петербургæй, Тольяттийæ, Самарæйæ æмæ Сочийæ.
Челæхсаты Рустем, РЦИ-Аланийы хицауады сæрдары хæдивæг: «Мæнмæ гæсгæ ацы спортивон фæз кæй фæзындис, уый руаджы нæ республикæйы цæрджытæ ардæм цæудзысты, сæ фæллад дæр уатдзысты, цы ног федерации байгом ис, уый ахæм хæстæ йæхимæ райсдзæни, æмæ нæ фæсивæд спортивон ерыстæм куыд цæуой, æмæ уæлихаздзинæдтæм куыд тырной».
Уазджытæн «æгасцуай» загътой фæсивæды хъуыддæгты, физкультурæйы æмæ спорты министр Бæройты Хасан, Дзæуджыхъæуы бынæттон администрацийы сæргълæууæг Дзантиаты Сергей, стæй ерысты сæйраг тæрхонгæнæг, Уæрæсейы гольфы ассоциацийы мини-гольфы комитеты сæрдар Александр Ершов.
Ацы цауимæ баст уыд республикæйы фыццаг мини-гольфы фæз кæй байгом, уый дæр. Цин ыл кодтой канд ерысы архайджытæ нæ, фæлæ ма горæты цæрджытæ дæр.
Минигольфы ахæм фæз нæй æппæт Уæрæсейы дæр. Йæ ас, стæй куыд арæзт у, уый дзуапп дæтты æппæт домæнтæн дæр. Ис дзы 18 хъазæн бынаты. Дих кæнынц сæ зындзинадмæ гæсгæ».
Наталья Мачехина ерыстæм ссыд Мæскуыйæ. Куыд зæгъы, афтæмæй мини-гольфæй хъазæн фæзтæ се ппæт сты зын, фæлæ уый спортсментæн у тынг пайда.
Наталья Мачехина, спорты мастер, Уæрæсейы чемпион мини-гольфæй: «Ацы ерыстæм ссыдысты спортсментæ Мæскуыйæ, Санкт-Петербургæй, Тольяттийæ æмæ нын ерыс кæнын æнцон нæу. Мæнæн ацы турнир у Уæрæсейы чемпионатмæ цæттæ кæнынæн фадат, уымæн æмæ дзы æрæмбырд сты тыхджын спортсментæ».
Æдæппæтæй турниры архайдтой 25 спортсмены. Ерыс кодтой дыууæ боны. Сылгоймæгты хсæн фыццаг бынат бацахста 13-аздзыд спортсменкæ Тольяттийæ – Елена Суконникова. Нæлгоймæгты хсæн та фæуæлахиз спорты мастер, Уæрæсейы дыууæ хатты чемпион мини-гольфæй – Сергей Фокин.
Гугкаты Иринæ
