Дзæуджыхъæуы ацыд наукон-практикон семинар «Экстремизмы фæзындты практикæ Цæгат Ирыстоны ахуыгæнæндæтты». Йæ саразыныл бакуыстой ахуыргæнджыты зонындзинæдтæ фылдæргæнæн институт, Цæгат Ирыстоны ахуырад æмæ наукæйы
Дзæуджыхъæуы ацыд наукон-практикон
семинар «Экстремизмы фæзындты практикæ Цæгат Ирыстоны ахуыгæнæндæтты».
Йæ саразыныл бакуыстой ахуыргæнджыты зонындзинæдтæ фылдæргæнæн институт,
Цæгат Ирыстоны ахуырад æмæ наукæйы, стæй национ ахастдзинæдты фарстаты
министрадтæ. Семинар цыд дыууæ боны. Архайдтой дзы республикæйы скъолаты
ахуыргæнджытæ.
Саламаты Светланæ у Даргъ-Къохы скъолайы
уырыссаг æвзаг æмæ литературæйы ахуыргæнæг. Ацы тренингы æхсызгонæй
архайы, уымæн æмæ æрæджы скъоладзаутæн райдыдта амонын ног предмет –
дины культурæйы æмæ æхсæнадон этикæйы бындуртæ.
Саламаты Светланæ, Даргъ-Къохы скъолайы
уырыссаг æвзаг æмæ литературæйы ахуыргæнæг: «Знон нын уыдис теоретикон
хай. Лекцитæ нын кастысты. Бирæ пайда дзы райстам нæхицæн. Фæлæ нæ
куысты практикæ куы вæййы, уый хуыздæр у. Уыдис нын психологон тренинг
дæр. Æмæ цы зонындзинæдтæ райстам, уыдон мах дæр сывæллæтимæ кусгæйæ,
практикæйы хуызы æвдисдзыстæм. Тренингтæ сын фæпайда уыдзысты æмæ
кæрæдзимæ хуыздæр цæстæй кæсдзысты».
Æдæппæтæй семинары архайдта 50
ахуыргæнæджы республикæйы алы районтæй. Фыццаг ацыдысты теоретикон
ахуыртæ, уыдысты лекциты хуызы. Семинары дыккаг хай та арæзт уыд
тренингтæй. Практикон ахуырты фæрцы ахуыргæнджытæн амыдтой, сывæллæттимæ
кусгæйæ цавæр мадзæлттæй пайда кæнæн ис, уый.
Цæллагты Артур, РЦИ-Аланийы национ
ахастдзинæдты фарстаты министрады хайады хицау: «Ахуыргæнæг куыд
профессионал, афтæ хъуамæ куса закъонмæ гæсгæ. Закъонмæ гæсгæ та дин æмæ
æхсæнад сты хицæн паддзахад. Æмæ абоны тернингтæ баст сты, сывæллæттимæ
куыд кусын хъæуы, цæмæй сæ зæрдæйы тас дæр ма бацæуа, фæлæ дзы бындурæн
уа гæнæн. Æмæ æвирхъау хабæртты ма бахауой, цæмæй æбуалгъ адæмы къух
хæцæнгарз ма суой. Не хсæнад, нæ адæм, нæ кæстæртæ, сæ сом бон уа
рæсугъд».
Дзытиаты Эммæ, ахуыргæнджыты
зонындзинæдтæ фылдæргæнæн институты ирон æвзаг æмæ литературæйы
кафедрæйы хистæр ахуыргæнæг: «Тренингты руаджы ахуыргæнджытæн амонынц,
сывæллæттимæ куыд кусын хъæуы уыцы æвзæрдзинады ныхмæ, уый. Ацы фæстаг
рæстæг нæм æрбацыдис уыцы дзырд – экстремизм. Нырмæ уый нæ зыдтам. Фæлæ
ныртæккæ нæ сывæллæттæн тæрсæм, цæмæй æппæт дунейы, стæй нæ бастæйы дæр
цы æвзæр хабæрттæ цæуы, уыдонæй цæмæй нæ сывæллæтты бахъахъхъæнæнæм».
Семинарæн стыр ахадындзинад кæй ис, уый
дызæрдыгкаг нæу. Цæгат Ирыстоны национ ахастдзинæдты фарстаты министрад
ацы куыст кæны 2008-æм азæй фæстæмæ. Ныридæгæн ахæм семинартæ арæзт
æрцыдысты æндæр къабæзты кусджытæн дæр. Ацы хатт та экстремизмы ныхмæ
профилактикæйæн цавæр мадзæлттæ аразын хъæуы, уыимæ базонгæ сты ахуырады
кусджытæ.
Гугкаты Иринæ
