Уый кадæн бæрæгбон арæзт æрцыд горæты аэродромы. Уазджытæ бакастысты рæсугъд авиа-шоумæ, сæ бон уыд уæлдæфон аппараттыл атæхын.
Ирыстоны фыццаг сылгоймаг-планерист Наталья Ермакова мæнæ ахæм планер «Бланик»-ыл Анатолий Морозовимæ сæвæрдта дунейы рекорд 1978-æм азы. Тæхæн аппаратыл схызтысты 7 мины æмæ 800 метры бæрзæндмæ. Дзæуджыхъæуы авиацион спортивон клубмæ сылгоймаг æрбацыд 67-æм азы йæ 2 хоимæ. Фæстæдæр уыдон æндæр цардвæндаг равзæрстой. Фæлæ Наталья йæ цард сбаста уæлдæфимæ.
Наталья Ермакова, планерон спорты мастер: «5 азы бакустон «Электроцинчы». Фæлæ мæ зæрдæмæ нæ цыд, æмæ йæ ныууагътон. Ам у тынг цымыдисаг. Иу бон иннæйы хуызæн нæу».
Дзæуджыхъæуы авиацион клуб бæстæйы у æппæтæй рагондæртæй иу. Сæххæст ыл 80 азы. Ис ын хъæздыг традицитæ. Советон Цæдисы заманы ам цæттæ кодтой бæстæйы хуыздæр тæхджыты.
Такъоты Сергей, РЦИ-Аланийы Хицауады сæрдар: «Æрмæст Ирыстоны нæ, фæлæ æппæт бæстæйы историйы дæр стыр бынат ахсы авиаклуб. 14 Советон Цæдисы хъæбатыры балæвар кодта нæ бæстæйæн, дуне майдантæ йын ис. Фæстаг рæстæг ис цавæрдæр зындзинæдтæ. Фæлæ сыл иумæйагæй бацархайдзыстæм, уынæм, клуб йæ къахыл слæууынмæ кæй хъавы».
Фæстаг 15 азы бæрц клубы куыст нывыл арæзт нæ уыдис. Фæлæ йæ разамонæг Козырты Руслан куы сси, уæд организацийы архайд зынгæ фæхуыздæр. Йемæ æрбакодта дæсны специалистты къорд. Абон авиа-клубы ис 2 хæдтæхæджы АН-2, планертæ кæй руаджы стæхынц, ахæм аппарат, 9 планеры. Уыйбæрц ма фæзындзæн иннæ аз дæр. Æппæтæй уæззаудæр уавæры ныртæккæ ис парашютон спорт.
Хъантемыраты Барис, РЦИ-Аланийы ДОСААФ-ы сæрдар: «Ныр агурæм ног парашюттæ. Æлхæнынмæ сты тынг зынаргъ. 2 парашютимæ хъуамæ гæпп адæймаг. Иуы аргъ та у 200 мины. Æмæ ма дзы æндæр хабæрттæ ис. Æфсадмæ дæр ныффыстам, ветерантимæ дæр ныхас кодтам. Хъуамæ нын æфсадæй хъуамæ чи бæззы, ахæм парашюттæ радтой. Тынг архайæм ныртæккæ уыцы хъуыддагыл».
Цæгат Кавказы парашютистты равдыстытæ, авиа-шоу. Клубы 80 азы юбилеймæ арæзт æрцыд цымыдисаг программæ. Сæ арæхстдзинад æвдыстой клубы раззагдæр специалисттæ. Æппæтæй рæсугъддæр уыд реактивон хæдтæхæг Л-29-ы равдыст. Йæ пилот Цæруаты Аслæнбег равдыста уæлдæр пилотажы фигурæтæ.
Бæрæгбоны авиа-клубы ирддæр минæвæрттæ хорзæхгонд æрцыдысты паддзахадон æмæ æхсæнадон хæрзиуджытæй.
Ацы клубы дуæрттæ гом сты се `ппæтæн дæр. Кæй бафæндыд, уыдонæн сæ бон уыд бæрæгбоны программæмæ уæлдæфæй бакæсын. Ахæм фадат фæцис не сфæлдыстадон къордæн дæр.
Хъайтмазты Дзерассæ
