филиал вгтрк государственная телерадиовещательная компания “Алания”

Дзæуджыхъæуы байгом кодтой инклюзивон клуб фæсивæдæн. Цæгат Кавказы у фыццаг. Клубы фылдæр ргом здахынц аивадмæ. Йе ‘нæниздзинад хъыгдард кæмæн у, уыцы æрыгæтты дзы ахуыр кæнынц кафыныл. 

Сфæлдыстадон къорды разамонджытæ куыд зæгъынц, афтæмæй сывæллæтты церебралон паралич æмæ дауны синдромæй хъыгдард адæмæн, стæй коляскæты чи ис, уыдонæн дæр сæ бон у кафын. Хъæуы сын æрмæстдæр баххуыс кæнын. 

Семæ кусынц кафыны аивады центры тренертæ æмæ волонтертæ. Кафджыты федераци республикæйы кусы 15 азы. Йæ уæнгтæ сты бирæ алыхуызон конкурсты æмæ фестивальты архайджытæ. Уыимæ куыд æнæниз кафджытæ, афтæ йе нæниздзинад хъыгдард кæмæн у, уыдон дæр. Ныридæгæн цæмæй раппæлой, уый сæм ис. Дыууæ хатты архайдтой æппæтдунеон конкурсы номинаци «параданс»-ы, æмæ дыууæ хатты дæр рамбылдтой сызгъæрин майдантæ. 

«Фæлæ сæйрагдæр уый нæу» – зæгъынц инклюзивон кафты артисттæ. «Кафты руаджы нæ цард кæны рæсугъддæр. Кæнæм уæндондæр, ныфс нæ бацæуы. Кæнæм фидардæр, не уæнгты бацæуы тых.

Волонтертæн дæр æхсызгон у – се ххуысæй рынчынтæй сæ низ кæй ферох вæййы. Цардбæллондзинад сæм кæй фæзыны. Конкурсты æмæ фестивальты сæхи хорз кæй равдисынц, уый та сын ныфс дæтты хуыздæр фидæнмæ. Æмæ сæхи раргом кæнынæн.