Æнæхъæн къуыри ам арæзт цыдысты алыхуызон ерыстæ – хæринаг кæнынæй, кувынæй æмæ ирон фынджы æгъдæуттæ зонынæй. Абон та бæрæгбонæн скодтой хатдзæгтæ, ахуыргæнæндоны арæзт æрцыд концерт дæр.
Алы хæринаг дæр конд æрцыд хицæн темæйыл æмæ уыд аивадон композици. Базарадон-экономикон техникумы ахуырдзаутæм хæринаг кæнынмæ ис сфæлдыстадон цæстæнгас. Ирыстоны рæсугъд хæхтæ æмæ æрдз, рагон цардæй ист скъуыддзæгтæ, райдзаст æмæ ирд ахорæнтæй конд дидинджытæ. Ацы къуырийы дæргъы ахуыргæнæндоны студенттæ ерыс кодтой хæринаг кæнынæй, кувынæй, ирон æгъдæуттæ зонынæй. Ерыс та арæзт æрцыд ирон адæмы кадджындæр бæрæгбон – Джеоргуыбайы къуыри.
Æбиты Валерий, Базарадон-экономикон техникумы разамонæджы хæдивæг: «Алы рæттæй нæм Ирыстоны кадджын адæм фæцыдысты, фæсивæдæн дзæбæх æмæ рæсугъд уайдзæфтæ фæкодтой, загътой сын, нæ фыдæлты намыс куыд бæрзонд æвæрд уыдис æмæ цы ис саразæн, цæмæй йæ ноджы бæрзонддæр скæнæм. Абон та у къуырисæр, Джеоргуыбайы æрвитæн бон æмæ йæ мæнæ кадджынæй, хъæлдзæгæй, намысджынæй æрвитæм».
Конкурсы архайдтой 14 командæйы. Се ппæтæн дæр арæзт æрцыд æмбæлгæ фаæттæ сæ курдиат раргом кæнынæн. Фыццаг бынат лæвæрд æрцыд Базарадон-экономикон техникумы хæринаггæнджыты хайады 1-æм курсы 15-æм къорды студенттæн.
Скъаты Богдан, Базарадон-экономикон техникумы 1-æм курсы студент: «Æз ам ахуыр кæнын фыццаг аз, æм дзы мæ зæрдæмæ тынг цæуы, æмæ ам æрцыдис тынг бирæ исвддзинæдтæ ирон æгъдауыл, ирон хæринæгтыл. Тынг бирæ ирон хæринæгтæ скодтам, тынг нæ фæндыдис рамбулын æмæ нын æхсызгон уыдис, фыццаг бант кæй бацахстам, уый».
Ирон адæмон хæринæгтæ кæныны фæтк базонын æмæ йæ дарддæр хæццæ кæнын – ахæм уыд конкурсы сæйраг нысан. Уыимæ ма ерысы архайджытæ бацæттæ кодтой ацы темæимæ баст плакаттæ æмæ цæттæ кодтой сæрмагонд æрмæг.
Дзугаты-Мурасты Риммæ, конкурсы жюрийы уæнг: «Махæн, жюрийы уæнгтæн уыдис тынг зын, фыццаг бынæттæ кæмæн радтæм, уый. Ацы ерысты иууылдæр разындысты уæлахиздзаутæ. Уыдон æрмæст æтнографион хабары нæ архайдтой, фæлæ ма равдыстой ирон рæсугъд кафт, ирон рагон куывд, куыд æмбæлы æмæ раст ацаходын дæр куыд хъæуы, уыдæттæ дæр равдыстой».
Конкурсы кæронбæттæны та арзæт æрцыд концерт. Сæ курдиатæй бæрæгбон саив кодтой республикæйы зындгонд артисттæ. Студенттæн дæр ахæм лæвар уыд тынг æхсызгон.
Гугкаты Иринæ
