филиал вгтрк государственная телерадиовещательная компания “Алания”

Дзæуджыхъæуы чырыстон училищæйы уыд фыццаг рауагъд. Ацы аз ахуыргæнæндон каст фесты 16 студенты. Бирæтæ сæ дарддæр фæнд кæнынц дины уæлдæр скъолатæм бацæуын. Рауагъдонтæн сæ дипломтæ кадджын уавæры радта училищæйы ректор, Дзæуджыхъæуккаг æмæ Алайнаг архиепископ Зосимæ. 

3 азы размæ республикæйы Уырыссаг чырыстон аргъуаны Синоды уынаффæмæ гæсгæ байгом дины Дзæуджыхъæуккаг училищæ. Ацы аз æй каст фесты 16 студенты. Уый у ахуыргæнæндоны фыццаг рауагъд. Ацы æхсызгон цауы тыххæй Мадымайрæмы кæрдæны аргъуаны арæзт æрцыд бæрæгбоны аргъуыд. Амыдта йæ Дзæуджыхъæуккаг æмæ Алайнаг архиепископ Зосима.

Училищæ каст чи фæци, уыдоны ‘хсæн ис Хъуысаты Игорь дæр. Йæ диплом ын радта училищæйы ректор архиепископ Зосимæ. Ныридæгæн Игорь службæ кæны Сыгъдæг Георгий-Уæлахизхæссæджы кафедралон аргъуаны. У иерей. Стыр бузныг у йæ ахуыргæнджытæй, 3 азы дæргъы йын æнæвгъауæй сæ зонындзинæдтæ кæй лæвар кодтой, уый тыххæй. 

Иерей Хъуысаты Игорь, Дзæуджыхъæуы чырыстон училищæйы рауагъдон: «Алы бон дæр нæ кодтой ахуыр. Канд наукæтыл нæ, фæлæ адæймаг йæхи хъуамæ куыд æвдиса. Дарддæр сахуыр кæнын фæнд кæнын. Кæд рауайа, уæд Стъараполы семинаримæ гæххæттытæ ратдзынæн, æмæ дарддæр Хуыцау куыд зæгъа, афтæ. Фæлæ мæн фæнды, ам нæ Ирыстоны зæххыл лæггад кæнын аргъуанæн».

Чырыстон дины минæвæрттæ куыд зæгъынц, афтæмæй училищæйы архайдæн стыр нысаниуæг ис. Абон Ирыстоны арæзт цæуынц ног аргъуантæ. Уымæ гæсгæ цæттæ кæнын хъæуы, уыдоны чи лæггад кæндзæн, ахæм адæмы. 

Дзæуджыхъæуы чырыстон училищæйы ма ахуыр кæны 20 студентæй фылдæр. Сентябры сæ нымæц фæфылдæр уыдзæн. Ныртæккæ ам æнхъæлмæ кæсынц абитуриенттæм. Ныридæгæн сын ис, ахуыр кæнынмæ сæ гæххæттытæ бадæттыны фадат.