У сæрмагонд нысан. Мыхуыргонд цæуы архитектурон æмæ историон ахадындзинад кæмæн ис, ахæм бæстыхæйттыл. Сбæлвырд кæнæн та йæ ис хуымæтæг чырæ хæтæлæй.
Дзæуджыхъæуы QR-кодтæ фæзынд 12 бæстыхайыл. Сты горæты Сабырдзинады проспекты, стæй, Баллаты Владимиры æмæ Миллеры уынгты цы рагон æмæ цымыдисаг хæдзæрттæ ис, уыдоныл. Штрих-кодты руаджы базонæн ис, бæстыхаимæ баст информаци – йæ истори, цæмæй цымыдисаг у, цавæр зындгонд адæм дзы цардис, стæй горæты картæйыл цы ран ис, уый. QR-код сбæрæг кæнæн ис чырæ хæтæлæй пайда кæнгæйæ. Хъæугæ прогаммæйы, стæй интернеты руаджы штрих-код ис раиртасæн. Студент Туаты Артурмæ ацы ногдзинад цымыдисаг кæсы. Куыд зæгъы, афтæмæй QR-кодты тыххæй йе мбæлттæн дæр радзырдта.
Туаты Артур: «Кæд Ирыстоны фæзындис, уый тынг хорз у. адæмæн æнцон у. Исчи йæ куы нæ зона, ардыгæй чи нæ у, уæд æй йæ телефонмæ сисдзæн, æмæ йæ базондзæн. Бызондзæн бынат, кæд конд у, цы дзы уыдис. Æмæ уый тынг хорз у».
Фыццаг QR-кодтæ фæзындысты Японийы 1994-æм азы. Дунейы та сæ парахатæй пайда кæнын райдыдтой 2000-æм азы. Нæ горæты проект арæзт цæуы администрацийы хъæппæрисæй. Цæгат Кавказы горæттæй ацы ногдзинад ис æрмæстдæр Дзæуджыхъæуы.
Томайты Хъазыбег, Дзæуджыхъæуы админстрацийы экономикæйы управленийы хицау: «Нырма уал сæ мах эксперименты хуызы скодтам 12 раны. Сæ фылдæр конд сты историкон центры, сыбырдзинады проспекты, стæй йæ цуры цы уынгтæ ис, уыцы хæдзæртты конд. Мах кæсдзыстæм, æмæ йæ адæм куы бамбарой, цы сарæзтам уый, сæ зæрдæмæ куы фæцæуа, уæд æвæццæгæн, уæд, æвæццæгæн, сæ нымæц фæфылдæр кæндзыстæм уыцы бæстыхæйттæн».
Ногдзинад хорзырдæм фæзындзæн Дзæуджыхъæуы æддаг бакастыл, культурон горæты мидисыл, зæгъынц проекты автортæ.
Гугкаты Иринæ
