филиал вгтрк государственная телерадиовещательная компания “Алания”

Ныр 50 азы бæрц у æхгæд æмæ тынг зилинаг. Хицæн ингæнтыл цы дидинджытæ ис, æрмæстдæр уыдон нысан кæнынц, госпиталон уæлмæрдмæ адæм кæй æрбацæуынц, уый. Сæдæгай ингæнтæ сты тынг зилинаг. Цыртдзæвæнтæ афæлдæхстысты, сæ алыварс нæй бырутæ. Бирæтæн сæ фыстытæ фехæлдысты, æмæ дзы чи ныгæд ис, уый сбæрæг кæнæн нæй. Госпиталон, кæнæ ма йæ куыд хонынц, горæты дыккаг уæлмæрд Дзæуджыхъæуы нымад у зæронддæртæй иуыл. Бындур æвæрд ын æрцыд 19-æм æнусы 80-æм азты. Ныгæдтой дзы, госпитальты цы æфсæддонтæ амард, уыдоны. Фæстæдæр та хуымæтæг адæмы дæр. Рæстæгимæ уæлмæрды фæзуат парахатдæр кодта. Фыдыбæстæйы Стыр хæсты азты ам æфсымæрон ингæны ныгæд æрцыдысты 180 советон салдатæй фылдæр. Ам ма ис Ястремскиты бинонты мыггаджы зæппадз.

Феликс Киреев, историк: «Сарæзта йæ купец Дмитрий Ястремский. Уыдис Польшæйæ рацæугæ. Алцыдæр дзы уыдис католикон стилы конд. Уæлейы уыд аргъуан, бынæй та зæппадз. Йæ бацæуæн уыд фæрсырдыгæй, мидæгæй – агъуыст. Йæ къултыл уыд нывæфтыдтæ. Уым уыдысты чырынтæ».

Госпиталон уæлмæрд иртасыныл Алина Акоефф архайы афæдзы бæрц. Бантыст ын 280 адæймаджы нæмттæ сбæрæг кæнын. Ацы куыст дарддæр æххæст кæны. Проекттæ «Сæфт Ирыстон» æмæ «Хæсты фæд»-ы разамонæджы фæндыд, цæмæй æфсымæрон ингæн скъахой æмæ дзы чи ныгæд ис, уый сбæлвырд кæной. Фæлæ горæты разамынд ууыл не сразы ис.

Алина Акоефф, проекттæ «Сæфт Ирыстон» æмæ «Хæсты фæд»-ы разамонæг: «Ивгъуыд къуырийы кæрон Æхсæнадон совет рахаста, ам мемориалон ингæн скæныны уынаффæ. Ахæм уынаффæимæ æз, иуæй разы дæн, иннæмæй та – тæрсын, ацы хъуыддаг æрмæст гæххæттыл кæй баззайдзæн, уымæй. Уымæн æмæ уæлмæрдмæ базилынæн хъæуы стыр фæрæзтæ. Фæлæ йæ æнæмæнг саив кæнын хъæуы. Уый у нæ хæс».

Ацы хъуыддаг Алинæйы хуымæтæджы нæ уырны. Æхсæнадон Советы секретарь Хъайтыхъты Тамарæ махæн æндæр хъуыды загъта. Бамбарын кодта, фарстайыл кæй бакуыстой, æмæ рахастой, уæлмæрд бахъахъхъæнын кæй нæ хъæуы, ахæм уынаффæ. Фыццаджыдæр, промышленнон зонæйы кæй ис, уый тыххæй, стæй, фаг æхца кæй нæй, уымæ гæсгæ.

Хъайтыхъты Тамарæ, Дзæуджыхъæуы æхсæнадон советы секретарь: «Дины кусджытæм мах бадзырдтам, æмæ сын загътам, цæмæй куыд æмбæлы динмæ гæсгæ, афтæ сын се `   гъдау скæной. Зосимæ дæр, Гуæцæлиты Хаджимурат дæр æобацæудзысты, æмæ уыцы хъуыддаг рæсугъд сараздзыстæм. Бæлвырд кæй зонæм, чи дзы ис ныгæд, уыдоны мыггæгтæ, горæты кæрон нæ мемориалы уыдзæн ног аргъуан. Уым уыдзæн стыр къул, горæты сæраппонд чи тох кодта, уыдоны нæмттæ дзы фыст уыдзысты. Уым ныгæд чи ис, уыдоны нæмттæ дæр уырдæм бахæсдзыстæм».

Кæронбæттæн уынаффæ нырма нæ рахастой. Ныртæккæ Æхсæнадон Советы цæттæ кæнынц сæрмагонд гæххæтт. Уый фæстæ йæ арвитдзысты горæты сæргълæууæгмæ æркæсынмæ.

Хъайтмазты Дзерассæ