филиал вгтрк государственная телерадиовещательная компания “Алания”

Дзæуджыхъæуы Кинойы хæдзары равдыстой Гулуты Вячеславы ист документалон ныв «Двойной портрет». Ныхас дзы цæуы дыууæ сылгоймагыл. Уыдон Цæцæны хæсты рæстæг сæ архайдæй аирвæзын кодтой мингай сывæллоны.Ныхас дзы цæуы дыууæ сылгоймагыл. Уыдон Цæцæны хæсты рæстæг сæ архайдæй аирвæзын кодтой мингай сывæллоны. Бирлант Касаева æрбабиноныг кодта сидзæрты, æмæ сæ батавта мады хъармæй. Любовь Крыжановская та, уæззау цæф чи фæцис, уыдонæн Мæскуыйы хуыздæр рынчындæтты скæнын кодта операцитæ. Йæ арфæйаг хъуыдаджы йын уыд иунæг æххуысгæнæн Иосиф Кобзон. Дыууæ сылгоймагыл Цæгат Ирыстоны хæдбар кинокомпани «Эдельвейс» систа документалон ныв. Йæ равдыстмæ æрбахуыдтой сæйраг хъайтарты.

Дыууæ сылгоймаджы хъæбатырдзинад иу документалон кинонывы. Бирлант Касаевайы хъысмæт цæхгæр аивта 94-æм азы Цæцæны хæсты фæстæ. Хæстон цауты фæмард йæ цардæмбал æмæ баззад 2 æнæхъом сывæллонимæ. Цардæн амæлттæ хъуыд, фæлæ куыд, уый не мбæрста. Æрмæст йæ зæрдæмæ хъусгæйæ зæххыл тыдта хæлардзинад. Ссардта бырондоны гыццыл лæппуйы æмæ йæ сæхимæ æрбакодта. Уый уыд йæ фыццаг æрбакæнгæ сывæллон. Дарддæр – фылдæр. Æмæ сæдæйæ фæфылдæр систы.

Документалон кинонывы иннæ хъайтар Любовь Крыжановская мæлæтæй аирвæзын кодта 72 сывæллоны. Сылгоймаг сарæзта программæ «Фронтовые дети Чечни», æмæ йæхæдæг нæмгуыты бынты цæугæйæ, агуырдта цæф сывæллæтты, æрвыста сæ Мæскуыйы рынчындттæм. Дыууæ сылгоймаджы хъæбатырдзинады тыххæй Цæгат Ирыстоны хæдбар киностуди «Эдельвейс» систа киноныв «Двойной портрет». Режиссертæ Чъерджиаты Индирæ æмæ Гулуты Вячеслав равдыстой дыууæ сылгоймаджы хъысмæт. Сæ иу цæры Цæцæны республикæйы, иннæ та – Мæскуыйы. Фæлæ Уæрæсейы культурæйы министрады хæслæвæрд сæххæст кодтой, æмæ йæ рахастой адæмы размæ.

120 сывæллоны хи хъæбултау схæссын, æмæ сæ раст фæндагыл сæвæрын. Ахæм æнтыстдзинад хуымæтæг сылгоймаг нæ равдисдзæн. Чи зоны, уымæн хорзæхгонд æрцыд сæрмагонд преми «Сызгъæрин зæрдæ»-йæ. Ахæм кады аккаг æппæт зæххы къорийы систы æрмæстдæр 5 адæймаджы.

Киноныв «Двойной портрет» сси цалдæр бæрнон премийы аккаг. Равдыстой йæ Цæгат Ирыстон цæрджытæн дæр. Ацы хатт та кинойы хæдзары радон равдыстмæ æрбахуыдтой дыууæ хъайтары. Ам сын уыд æнæнхъæлæджы фембæлд, æмæ радон хатт кæрæдзийæн загътой бузныг. Раарфæ сын кодтой цæгатирыстойнаг кинодзаутæ дæр.

Цæрын хъæуы адæмæн, æмæ уæд дуне уыдзæн хуыздæр, ахæм ныстуанимæ цæуынц дыууæ сылгоймаджы иу фæндагыл. Æмæ кæд уардитæй тыд нæу, уæддæр дзы сты бузныг, уымæн æмæ сылгоймаджы нысан сæххæст кодтой дывæрæй.