филиал вгтрк государственная телерадиовещательная компания “Алания”

«Нарты сæндидзæн». Ахæм сæргондимæ Дзæуджыхъæуы нотæты библиотекæйы байгом Бетанты Фрэды куыстыты экспозици. Ацы равдыст авторæн у 4-æм. Ис 40 куысты, сты нывкæнынады æмæ графикæйæ конд. Фæлæ дзы, æнæмæнг, алкæмдæр ис национ символикæ æмæ орнаменттæ. Сæйрагдæр та уый у, æмæ алы куысты дæр ис Нарты ныв: кæм символикон сырдты хуызы – стайы, кæфхъуындары кæнæ халоны хуызы, кæм та къæдзæхтæ сты Нарты хуызæн. Фенæн дзы ис, ахудæн кæуыл ис ахæмтæ дæр, зæгъæм Нарты адæмы æмæ иннæ планетæты цæрджыты фембæлд. Ирд ахорæнтæй Бетанты Фрэд æвдисы нарты ариаг паддзахад.

Куыд зæгъы афтæмæй йæ фæнды, цæмæй йæ куыстытæм кæсгæйæ, фæсивæдмæ гуыра цымыдисдзинад нæ фыдæлты цардыуагмæ, историмæ, культурæмæ, фольклормæ.

Ис æм фæндон дæр, цæмæй йæ нывтæй исчи национ чингуытæм иллюстрацитæ куыд скæна. Уæд сын уаид тынг бузныг. Бетанты Фрэд сыл куыста 2 азы. Равдыст цæудзæн мæй.