Архайдта дзы 100 адæймагæй фылдæр. Ерыс кодтой 3 кары категорийы, стæй ансамбльтæ.
Дзæуджыхъæуы ныр 3-аг хатт арæзт æрцыд
Мыстулаты Иринæйы номыл фæндырдзæгъдджыты конкурс. Архайдта дзы 100 адæймагæй
фылдæр. Ерыс кодтой 3 кары категорийы, стæй ансамбльтæ. Конкурс арæзт æрцыд
Мыстулаты Иринæйы бинонты хъæппæрисæй. Баххуыс сын кодтой традицион культурæ
æмæ этнотуризмы центр «Фарн»-ы кусджытæ Хъоцлаты Сослан æмæ Битарты Ларисæ. Сæ
ныхæстæм гæсгæ, сфæлдыстадон ерысы сæйраг нысан у, рæзгæ фæлтæрæн æххуыс кæнын
сæ курдиат раргом кæныны хъуыддаджы. Бæлвырддæр хабæрттæ радзурдзæн Хъайтмазты
Дзерассæ.
Хайты Миланæ цæгъды «Ерысы цагъд». Композицийыл бакуыста йæ
ахуыргæнæг Мыстулаты Иринæ. Ёрыгон чызджы къухты, фæндырдзæгъдджыты конкурсы цы
гран-при рамбылдта, уый. Сфæлдыстадон ерыс уыд Мыстулаты Иринæйы номыл, æмæ йын
уымæ гæсгæ ацы хæрзиуæг уæлдай ахсджиаг у. Миланæ та ацы аз дæр сфæнд конкурсы
архайын. Йæ ныхæстæм гæсгæ, йын сæйрагдæр у рамбулын нæ, фæлæ йæ ахуыргæнæджы
номимæ цы хъуыддаг баст, уый хай уæвын.
Хайты Миланæ, культурæйы республикон колледжы студенткæ:
«Конкурсы куы архайдтой, уæд æнхъæл дæр нæ уыдтæн, кæй рамбулдзынæн. Тынг цин
кодтон. Конкурсы фæстæ мæхиуыл фылдæр кусын райдыдтон. Архайдтой мы бирæ
конкурсты».
Мыстулаты Иринæйы номыл фæндырдзæгъдджыты конкурс ныр 3-аг
хатт арæзт æрцыд. Архайджыты курдиатæн аргъ кодта дæсны жюри, йæ сæргъы
Мыстулаты Иринæйы чызг, республикæйы адæмон артисткæ Хуытыгаты Маринæ, афтæмæй.
Ацы зæлтæ Цæгат Ирыстоны се *ппæтæн дæр уарзон сты. Мыстулаты
Иринæйы сæрмагонд стиль æнæбазонын нæ уыд.
Йæ номыл конкурсы архайынмæ курдиæттæ балæвæрдтой 100
адæймагæй фылдæр Дзæуджыхъæуæй æмæ республикæйы æппæт районтæй. Ерыс кодтой 3
кары категорийы, стæй ансамбльтæ. Бирæты сценæмæ рахæссын бафæндыд, Мыстулаты
Иринæ кæуыл бакуыста, уыцы музыкалон композицитæ.
Конкурсы хатдзæгтæм гæсгæ, алы къорды дæр сбæрæг уыдзысты 3
хуыздæры, равзардзысты ма, гран-при чи рамбулдзæн, уыцы архайæджы дæр.
Традицимæ гæсгæ йын саккаг кæндзысты фæндыр.
Мыстулаты Иринæйыл 13 азы куы цыд, уæд сси фæндырдзæгъдджыты
конкурсы уæлахиздзау. Афтæ райдыдта йе сфæлдыстадон фæндаг. Гæнæн ис, æмæ ацы
конкурс дæр æрыгон курдиаттæн суыдзæн фидæнмæ къахдзæф».
