Ныр 9-æм аз Цæгат Ирыстоны аивадуарзджытæн фадат ис дунейы æмæ Уæрæсейы зындгон артистты сфæлдыстадæн аргъ скæнынæн. Ацы хатт нæ республикæмæ ссыдысты артисттæ
Цæгат Ирыстоны аивадуарзджытæ алы сæрд дæр цы культурон цаумæ фенхъæлмæ кæсынц, уый та ныр дæр байгом Оперæ æмæ балеты театры сценæйы. 9-æм хатт аивæдты æппæтадæмон фестиваль «Уазæгуаты Гергиты Ларисæмæ» æрæмбырд кодта балеты, оперæйы æмæ театралон дæсныйады курдиатджын артистты. Байгом æй кодтой фестивалы автор æмæ сæйраг аразæг, Уæрæсейы æмæ Украинæйы адæмон артисткæ Гергиты Ларисæ æмæ Республикæйы хицауады сæрдар Такъоты Сергей.
Уæлдай къухæмдзæгдимæ аивадуарзджытæ сæмбæлдысты фестивалы уазæгыл, не `мзæххон, Стыр Театры сæйраг дирижер Сохиты Тугъаныл. 9-æм фестиваль иннæтæй ныридæгæн кæй хицæн кæны, уый фыццаг концертæй дæр бæрæг у, фæнысан кодта Гергиты Ларисæ.
Гергиты Ларисæ, Уæрæсейы æмæ Украинæйы адæмон артисткæ: «Ацы концерт æвдисы, ныридæгæн нæм цы вокалон скъола ис, уый. Зарæггнджытæ бæстæйы æмæ дунейы алыхуызон оперæйы театртæй – Къарейæ, Сомихæй, Казахстанæй, Бурятийæ, Латвийæ, Великобританийæ, Мæскуыйæ, Санкт Петербургæй æмæ Кæсæг-Балхъарæй.Уыдонимæ ма Стыр æмæ Мариинаг театрты балеты кафджытæ. Мæ бон зæгъын у, æмæ 3 къуырийы дæргъы, ам, оперæ æмæ балеты театрты сценæйыл уыдзæн аивады бæрæгбон».
Фестиваль райдыдта хæлардзинады концертæй. Иу сценыйы оперæ æмæ балеты зындгонд артисттæ дунейы алы рæттæй, æппæтадæмон конкурсты лауреаттæ. Бурятийы оперæ æмæ балеты академион театры солисткæ Аюна Базаргуруева Цæгат Ирыстоны ис фыццаг хатт. Куыд зæгъы, афтæмæй йын тынг æхсызгон у ацы ацы фестивалы архайын. Акодта Тоскайы ари Пуччинийы оперæйæ.
«Аивæдты æппæтадæмон 9-æм фестиваль «Уазæгуаты Гергиты Ларисæмæ» цæудзæн 5-æм июльмæ. Уыцы рæстæгмæ зындгонд артисттим иумæ сæ аивад равдисдзысты æрыгон курдиаттæ дæр. Абон та оперæ æмæ балеты театры сценæйы зары Павел Милюков æмæ цæгъды пианист Сергей Редькин».
Гугкаты Иринæ
