Цалдæр боны Кавказы фæндырдзæгъдджытæ се сфæлдыстадæй циндзинад хæсдзысты республикæйы цæрджытæн. Цымыдисаг вæййы хистæртæн дæр, фæсивæдæн дæр, суанг ма сывæллæттæн дæр.
Адæмон музыкалон инструменты радон фестивальмæ Ирыстоны аивадуарзджытæ зæрдиагæй æнхъæлмæ кастысты. Уæвгæ йæ зонынц, куыд иннæ азты, афтæ ныр дæр уыдзæн цымыдисаг, зæрдæмæдзæугæ, хъæлдзæг. Фестивальмæ ссыдысты уазджытæ Кавказы æппæт республикæтæй, Хуссар Ирыстонæй. Ацы аз ма аивадуарзджытæ базонгæ уыдзысты Сомихы республикæйы фæндырдзæгъдджытимæ.
Пагæты Иннæ: «Ирон фæндыр тынг бирæ уарзын æмæ æрбацыдтæн ацы бæрæгбонмæ. Æхсызгон мын у бирæ курдиатджын музыканттæ нæм кæй æрбацыд, уый. Æмæ нын ахæм бæрæгбон чи сарæзта, уыдонæн бузныг».
Ивгъуыд фестивальты архайджытæ Рамзан Паскаев, Хасан Сохов, Аслан Дудар, Абу-Бакар Махмудов, Рая Евлоева, Артур Гонгапшев, Валерий Вороков, Галимат Кенчешаова, Шамиль Исаев æмæ æндæр фæндырдзæгъдджыты нæмттæ республикæйы цæрджытæн ныридæгæн дæр зонгæ систы.
Дзуццаты Сослан, РЦИ-Аланийы сгуыхт артист: «Æхсызгон мын у адæмы зæрдæмæ кæй цæуы, артисттæ дæр зæрдиагæй кæй ссæуынц, уый. Ацы проект куы кодтам, уæд нæ фæндыд цæмæй æппæты фыццаг культурæйы руаджы, музыкæйы, растдæр зæгъгæйæ та, фæндыры зæлты руаджы нæ бастдзинад фидардæр куыд кæна. Куыд мæмæ кæсы, афтæмæй нын бантыст. Ацы аз нæм ноджы фылдæр артситтæ ссыд. Æмæ уый дæр хорз у».
Фестиваль арæзт æрцæуы дыууæ азы иу хатт. Æмæ йæм алы хатт дæр ссæуынц сыхаг республикæты зындгонд фæндырдзæгъдджытæ. Ацы хатт уыд цыппæрæм. Афæдзæй-афæдзмæ фестиваль архайджыты нымæц фылдæр кæны, уыимæ йæм ссæуынц куыд фæлтæрдджын музыканттæ, афтæ æрыгæттæ дæр. Цымыдисаг та вæййы се ппæтæн дæр: хистæртæн дæр, фæсивæдæн дæр, суанг ма сывæллæттæн дæр.
Цæгат Ирыстоны фестиваль арæзт æрцæуы Хадыхъаты Аллæ æмæ Дзуццаты Сосланы хъæппæрисæй. Æмæ куыд зæгъынц, афтæмæй ацы музыкалон бæрæгбоны нысан у Кавказы адæмты æрбангомдæр кæнын, цæмæй сæ музыкæйы зæлтæ кæрæдзимæ тынгдæр сбæттой æмæ зæрдæйы уидæгтиммæ баиу кæнгæйæ, фидар кæной лымæндзинады æмæ хæлардзинады фæндаг. Артисттæй алчидæр йæ арæхстдзинад кæй равдисдзæн, уый та се ппæт дæр у уды бæрæгбон.
Зыхъуаты Жаннæ
