филиал вгтрк государственная телерадиовещательная компания “Алания”

08:30 воскресенье, 13 июля 2025
18 октября 2013, 10:52
Дзæуджыхъæуы скъола-интернаты арæзт æрцыд инклюзивон ахуырады семинар

Дзæуджыхъæуы скъола-интернаты арæзт æрцыд инклюзивон ахуырады семинар. Архайдтой дзы йе ‘нæниздзинад хъыгдард кæмæн у, ахæм сывæллæттæ кæм ахуыр кæнынц, уыцы скъолаты ахуыргæнджытæ.

Дзæуджыхъæуы скъола-интернаты арæзт æрцыд инклюзивон ахуырады семинар

Дзæуджыхъæуы скъола-интернаты арæзт æрцыд инклюзивон ахуырады семинар. Архайдтой дзы йе ‘нæниздзинад хъыгдард кæмæн у, ахæм сывæллæттæ кæм ахуыр кæнынц, уыцы скъолаты ахуыргæнджытæ. Радзырдтой сын, ахуырадон процессы цавæр методикæтæй пайда кæнынц, уый тыххæй. Сывæллæттæ та уазджытæн равдыстой спектакль. Интернаты уыдис не сфæлдыстадон къорд дæр.

8-аздзыд Дзебысаты Орнеллæйы курдиат дисы бафтыдта инклюзивон ахуырады семинары архайджыты. Чызг ахуыр кæны республикон скъола-интернаты 1-æм къласы. Рынчын у сывæллæтты церебралон параличæй. Фæлæ кæд йе ‘нæниздзинад хъыгдард у, уæддæр Орнеллæ у цардуарзон æмæ зæрдæхæлар сывæллон, йæ уды хъарм лæвар кæны иннæтæн дæр. Уырны йæ, тагъд рæстæджы йæ бон æнæ искæй æххуысæй цæуын кæй суыдзæн, уый. Фидæнмæ йæм ис рæсугъд фæндтæ.

Дзебысаты Орнеллæ, республикон скъола-интернаты ахуырдзау: «Æз хъуамæ суон дохтыр, цæмæй адæмæн æххуыс кæнон. Æз æй зонын, æххуыс кæнын хъæуы адæймагæн. Кæмæн фæнды дæр, уæлдай нæу. Ахуыргæнджытæ мын ис тынг хорз. Нæ диретор та у бынтон диссаг. Æз мæ ахуыргæнджыты бирæ уарзын. Уарзынц нæ».

Цæгат Ирыстоны инклюзивон ахуырады формæмæ гæсгæ фыццаг кусын райдыдтой республикон скъола-интернаты. 2008-æм азы, йе ‘нæниздзинад хъыгдард кæмæн у, уыцы сабитæн фæцис иннæ скъоладзаутимæ ахуыр кæныны фадат. Уый уыдис ЮНИСЕФ-ы æмæ ахуырады æмæ наукæйы министрады иумæйаг проект.

Абон ахæм сывæллæттæ скъолайы ахуыр кæны 18. Ам сын сарæзтой хорз фадæттæ. Скъола æххæстгонд у сæрмагонд кусæнгæрзтæй, ис дзы фæлладуадзæн агъуыст. Ахуыргæнджытæ та уыдысты цæттæгæнæн курсыты Махачкалайы, Налцыччы æмæ Мæскуыйы.

2011-æм азы республикæйы фидаргонд æрцыд программæ «Доступная среда». Уый стыр æххуыс у инклюзивон ахуырады райрæзтæн. Абон Цæгат Ирыстоны 10 скъолайы иннæ скъоладзаутимæ иумæ ахуыр кæны, йе ‘нæниздзинад хъыгдард кæмæн у, ахæм 200 сывæллоны. Программæмæ гæсгæ ацы аз республикон скъола-интернатæн æмæ Беслæны Коминтерны уынджы скъолайæн федералон æмæ Цæгат Ирыстоны бюджеттæй радих кæндзысты 5 милуаны æмæ 200 мин сомы.

Кокойты Тея, РЦИ-Аланийы ахуырады æмæ наукæйы министрады хайады специалист: «Хъуамæ сын радтой компьютерон æмæ реабилитацион техникæ. Ацы скъолайæн радих кодтой инвалидтæн транспорт, цæмæй сæ скъоламæ уыцы транспортыл ласой».

Уымæй уæлдай ма ацы аз инклюзивон ахуырады райрæзтæн республикон бюджетæй радих кæндзысты 8 милуан сомы, цæмæй се ‘ппæт сывæллæттæн дæр уа æмбæлгæ ахуырад райсыны фадат.

темæмæ гæсгæ
vgtrk_alania
vgtrk_alania
vgtrk_alania
vgtrk_alania