Дзæуджыхъæуы цæрджыты тыхсын кæны, æнæхицау куыйтæ кæй сбирæ сты, уый

15 февраля 2013, 11:28

Сæрмагонд экологон службæйы кусджытæ алы мæй дæр уынгты æрцахсынц 200 куыдзы бæрц. Фæлæ уавæр нæ хуыздæр кæны.

Сæрмагонд экологон службæйы кусджытæ алы мæй дæр уынгты æрцахсынц 200 куыдзы бæрц. Фæлæ уавæр нæ хуыздæр кæны. Адæм сын тæригъæд кæй кæнынц, уымæ гæсгæ, специалистты нæ фæуадзынц сæ куыст, куыд æмбæлы, афтæ æххæст кæнын.

Ацы къæбылатыл цæуы дыгай мæйтæ. Æнæхицау цæрæгойты кæм дарынц, уыцы бынатмæ сæ æрбахастой цалдæр боны размæ. Уæвгæ, ахæм куыйтæ ам ис сæдæйæ фылдæр. Ардæм æрбахауынц уынгтæй, кæнæ сæ арбахæссынц адæм. Фæлæ сырддоны директор куыд зæгъы, афтæмæй ам бирæ рæстæг нæ бафæстиат вæййынц.

Томайты Ибрагим, Дзæуджыхъæуы сырдты æндарæны директор: «Ардыгæй сæ мах дæттæм адæмæн. Газеты ныффыссæм, æмæ сæ адæм айсынц. Кæцæй не рбацæуынц? Дагестанмæ дæр ма сæ аласынц. Ам дагестайнæгтæ цардысты æмæ 6 куыдзы алстой. Махæн, дам, адон хорз уыдзысты».

Сырддоны дарæн ис 200 куыдзæй фылдæрæн. Фæлæ æнæхицау цæрæгойтæн уыцы бынат нæ фаг кæны. Куыстуат «Спецэкослужба»-йы специалисттæ иу мæймæ ардæм æрбаласынц 200 куыдзæй фылдæр. Архайынц æрмæстдæр цæрджыты курдиæттæм гæсгæ. Фæлæ специалистты ныхæстæм гæсгæ, сæ куыст æххæстгæнгæйæ сын арæх къуылымпыдзинæдтæ æвзарын кæнынц адæм.

Датиты Руслан, куыстуат «Спецэкослужба»-йы хайады хицау: «Адæм нæ нæ уадзынц. Æндæр нæ куы уадзиккой, уæд горæты иу куыдз дæр нал баззаид иу мæймæ. Æз мæ ныхасæн хицау дæн. Фæлæ адæм нæ уадзынц кусын. Хъæр кæнын райдайынц, æрæмбырд вæййынц. Лæппутæн, чи кусы, уыдонæн сæ цæстыты се нгуылдзтæ тъысынц. Уыдон цы митæ сты».

Фæлхасадмæ цæстдарды федералон службæйы цæгатирыстойнаг управленийы бæрæггæнæнтæм гæсгæ фарон республикæйы сырдты хсæн уыд æрранизы 40 цауы. Уыдонæй 15 уыдысты куыйтæ, сæ хыгъды, хицæуттæ кæмæн нæй, ахæмтæ дæр.

Отараты Нелли, Фæлхасадмæ цæстдарды федералон службæйы цæгатирыстойнаг управленийы хайады хицау: «Æнæхицау сырдты кæм хъуамæ дарой, ахæм бынæттæ республикæйы фаг нæй. Уымæй уæлдай сырдтимæ чи архайы, стæй кæуыл фæхæцыдысты, уыцы адæмæн хъæуы профилактикон иммунизаци кæнын».

Дзæуджыхъæуы администрацийы куыд æмбарын кæнынц, афтæмæй æнæхицау куыйты нымæц фылдæр кæны, адæм сæ уынгмæ кæй ратæрынц, уый тыххæй. Ахæм сырдтæ тæссаг сты цæрджытæн. Уыимæ æхсæнадæн знаггад хæссынц хæдзарон цæрæгойтæ дæр. Сæ хицæуттæ, горæты администрацийы цы сæрмагонд æгъдæуттæ фидаргонд æрцыд, уыдон не ххæст кæнынц. Зæгъæм, куыйтимæ хъуамæ æддæмæ цæуой, адæм къаддæр кæм ис, уыцы бынæттæм. Уыимæ хъуамæ уой баст.

Адæймаг йæ куыдзимæ уынгмæ куы рацæуа, æмæ æмбæлгæ домæнтæ куы не ххæст кæна, уæд æфхæрд æрцæудзæн административон æгъдауæй. Мæскуыйы ивары бæрц у мин сомы онг, Красноярскы – 2, Санкт-Петербурджы та – 4 мины онг. Дзæуджыхъуы йæ нæма сбæрæг кодтой».

Хъайтмазты Дзерассæ