Телерадиокомпани «Алани»-йы программæйы арæх фæнæн вæййы равдыст «44 долгота». Бирæтæн сси уарзон. Нырæй фæстæмæ ацы телевизион проект æмæ ма бирæ æндæр цымыдисаг
Кадиты Тамарæ, журналы редактор: «Этнографион куыстытæ, æвзагзонынад, иртасæн куыстытæ – ацы журналы бакæсæн уыдзæн раздæр мыхуыргонд чи нæма уыд, ахæм æрмæджытæ. Куыд нæм кæсы, афтæмæй, цæмæй хуыздæр кæнæм, уый тыххæй алчидæр хъуамæ йæхицæй райдайа, йæхиуыл куса».
Йæ саразджытæ куыд зæгъынц, афтæмæй журнал цымыдисаг уыдзæн алы кары адæмæн дæр. Фыццаджыдæр та, йæ райгуырæн бæстæ хуыздæр базонын кæй фæнды, уыдонæн.
Культурæ, фольклор, æрдз, архитектурон цыртдзæвæнтæ нæ фыдæлтæ рæсугъд æгъдæуттæ – алцæй тыххæй дæр бакæсæн ис журналы фыццаг номыры.
Цæудзæн æртæ мæйы иу хатт. Фыццаг тираж у 1000 экземпляры. Адæмы зæрдæмæ куыд фæцыд, уымæ гæсгæ зæгъæн ис, æмæ кæндзæн фылдæр. Парахат æй кæндзысты куыд Ирыстоны, афтæ Уæрæсейы иннæ регионты дæр. Журналы æрмæджытæ бакæсæн ис йæ сайты. Уымæ гæсгæ семæ зонгæ кæндзысты, фæсарæнты чи цæры, кæнæ йæ къухы журнал кæмæн нæ бафтыд, уыдоны дæр.
«44 долгота»-йы автортæ æмæ редакцийы уæнгтæ сæ размæ æвæрынц ирон æвзаг бахъахъхъæны æмæ райгуырæн зæххы хæзнатæ базоныны хæс. Сайты ис алыхуызон проекттæ: ирон æвзаджы уроктæ, ирон æвзагмæ тæлмацгонд мультипликацион, документалон æмæ аивадон кинонывтæ, зарджытæ, лекцитæ историйæ, мыггæгты, горæтты æмæ хъæуты тыххæй иртасæн куыстытæ.
Сывæллæттæн цымыдисаг уыдзæн Нарты кадджытæм гæсгæ иллюстрацитæм бакæсын. Хистæр кары адæм та æхсызгонæй бакæсдзысты рагон къамтæм, зæронд Дзæуджыхъæуы хуызистытæм. Проект «Личное дело»-мæ кæсгæйæ, æрхъуыды кæндзысты Фыдыбæстæйы Стыр хæсты хъæбатырты нæмттæ. Æрмæджытæ фыст сты уырыссаг æмæ ирон æвзæгтыл. Сайт саразджытæн сæ зæрды ис æрмæджытæ дыгуронау æмæ англисагау цæттæ кæнын дæр.
Тахъазты Фидар, филологон наукæты кандидат: «Ацы программæ кæй фæзынд, уый тынг хорз уыдзæн сеппæтæн дæр. Алы адæймагæн дæр йæ хæс у йе взаг зонын, йе бæстæ, йæ истори æмæ культурæ. Æмæ ахæм хъуыддаг кæй фæзынд, журнал дæр, стæй сайт дæр, уый тынг ахъаз уыдзæн кæстæртæн дæр, хистæртæн дæр».
