Уый сын æрмæст хæслæвæрдтæ кæныны рæстæг нæ уыд, фæлæ ахсджиаг къахдзæф сæ фидæны дæсныйадмæ
Наукæмæ цымыдисдзинад царды сæйраг хъуыддаг куы свæййы, уæд хатдзæгтæм дæр бирæ *нхъæлмæ кæсын нæ фæхъæуы. Уый равдыстой дзæуджыхъæуккаг скъоладзаутæ æппæтуæрæсеон олимпиадæйы биологийæ йæ кæронбæттæн къæпхæны. Уый сын æрмæст хæслæвæрдтæ кæныны рæстæг нæ уыд, фæлæ ахсджиаг къахдзæф сæ фидæны дæсныйадмæ. Предметмæ уарзондзинады æмæ ахуыргæнджыты æххуысы руаджы куыд ис бæрзонд бæрæггæннæтæ райсын, уый тыххæй радзурдзæн Чехойты Фатимæ.
Предметмæ уарзондзинад, хиуæтты *ххуыс, сæйрагдæр та – ныфсджын уæвын. Уæлахизмæ фæндаг уыдоны руаджы бантысы, зæгъы Гуыбаты Аидæ. Биологийæ æппæтуæрæсеон олимпиадæйы призер кæй сси, уый чызджы ныхæстæм гæсгæ, йæ зæрдыл дардзæн йæ царды кæронмæ. Уый уыди æгæрон тыхтæ æмæ бирæ рæстæг чи домдта, ахæм æхсызгон хъуыддаг.
Олимпиадæйы призер суæвгæйæ чызгæн фæзынд фадат æнæ Иумæйаг паддзахадон фæлварæнтæй бацæуын бæстæйы цавæр фæнды уæлдæр профилон ахуыргæнæндонмæ. Аидæ йæ фидæны дæсныйад кæд бæлвырд нæма равзæрста, уæддæр зоны, биологиимæ баст кæй уыдзæн, уый. Предметмæ цымыдисдзинад йæ зæрдæйы сæвзæрд 7-æм къласы ахуыргæнгæйæ. Уæд æй бафæндыд, йæ ныййарджыты хуызæн, медицинон кусæг суæвын.
Биологимæ цымыдисдзинад Сергей Сергеевы зæрдæйы сæвзæрд 7-æм къласы ахуыргæнгæйæ. Æмæ уæдæй нырмæ мынæг нæ кæны, фæлæ рæзы бонæй бонмæ. Лæппуйы фæнды, цæмæй биологи йæ царды сæйраг хъæуыддаг суа, уый.
Сергей дæр у биологийæ скъоладзауты æппæтуæрæсеон олимпиадæйы архайæг. Призон бынат бацахсынæн ын не сфаг 13 баллы. Йæ ныхæстæм гæсгæ, уый тыххæй йæ къухтæ не *руадздзæн, фæлæ дарддæр кусдзæн йæ зонындзинæдтæ уæрæхдæр кæныныл, цæмæй суа фидæны олимпиадæйы уæлахиздзау.
Æмæ уый уыдзæн стыр хатдзæг æрмæст Сергейæн нæ, фæлæ азæй азмæ ног курдиатджын фæсивæды чи сбæрæг кæны, республикæйы уыцы ахуырады системæйæн дæр.
Йæ зонындзинæдтæ равдисын æмæ æппæтуæрæсеон уæлвæзады хуыздæр суæвын кæй фæнды, уыдоны нымæц чысыл нæу. Бацæттæ кæнынæн ма рæстæг ис. Уæлахиздзаутæ суæвыны тыххæй сын арæзт цæуынц æппæт фадæттæ дæр.
