Уый къухы бафтыд, æппæтуæрæсеон проект «На крыльях мечты – под парусами надежды»-мæ гæсгæ
Дзæуджыхъæуккаг авиацион-спортивон клубы се *нæниздзинад хъыгдард кæмæн у, уыцы адæмæн фадат уыд планертыл атæхынæн. Уый къухы бафтыд, æппæтуæрæсеон проект «На крыльях мечты – под парусами надежды»-мæ гæсгæ. Ахæм мадзал фыццаг хатт арæзт не *рцыд. Ацы хатт планерыл атæхынмæ сæ ныфс бахастой 14 адæймаджы. Бæлвырддæр хабæрттæ радзурдзæн Хъайтмазты Дзерассæ.
Стæхыны размæ, æнæмæнг, инструктаж. Парашютон системæтæ конд сты, рæттæ бафтыдтой. Разæй æнхъæлмæ кæсы æгæрон рæсугъддзинад. Алена Пономаренкойæн арвы онг стæхын уыд йæ бæллиц йæ сабибонтæй фæстæмæ. Æмæ йæ сæххæст кæнын йæ къухы бафтыд. Ныр та йын фадат фæцис, уыцы æнкъарæнтæ ногæй бавзарынæн.
Хохмæ схизын кæнæ та уæлдæфон балцы ацæуын. Цомайты Римæйæн активон хуызы фæллад уадзын райдыдта планЕрыл атахынæй. Йæ ныхæстæм гæсгæ, йæ арвы онг стæхын кæддæриддæр фæндыд, фæлæ тæрсгæ кодта. Ацы хатт Римæ йæ хъарутæ бамбырд кодта æмæ йæ фæндон сæххæст кодта. Куыд зæгъы, афтæмæй фыццаг æдасдзинады рæттæ нæ уæгъд кодта, уый фæстæ алцыдæр ферох кодта.
Æрдзимæ баиу уæвынæн æмæ йын йæ тых бавзарынæн æххуыс кæнынц Дзæуджыхъæуккаг авиацион-спортивон клубы фæлтæрдджын инструктортæ. Тæхыны фыццагон зонындзинæдтæ зæххыл амонынц, уый фæстæ та процессмæ сæ цæст дарынц арвы. Куыст координаци кæны радисткæ.
Сæхи бафæлварынмæ æрæмбырд сты, се *нæниздзинад хъыгдард кæмæн у, ахæм адæм. 14 адæймагæн бантыст сæ тасы сæрты ахизын æмæ рамбулын символикон майдантæ æхсардзинады тыххæй. ПланЕртыл атæхын сæ бон сси æппæтуæрæсеон проект «На крыльях мечты – под парусами надежды»-мæ гæсгæ. Æххæст æй кæны Уæрæсейы инвалидты спортивон цæдис президентон грантты фондимæ иумæ. Ахæм экстремалон мадзал проектмæ гæсгæ 4-æм хатт арæзт æрцыд.
Æнæмоторон тæхæн аппарат, фыццаг бакастæй куыд кæсы, афтæ хуымæтæг нæу. ПланЕртæн нæй змæлынгæнæн. Стæхы буксиргæнæн хæдтæхæджы æххуысæй. Ахсджиаг у, ма мæт кæнын, цæмæй 15 минуты тахты рæстæг фадат уа Ирыстоны рæсугъд æрдзмæ æркæсынæн. 600 метры бæрзæндæй адæймагмæ кæсы, цыма Кавказы æфцæгмæ къухæй бандзæвын ис, афтæ.
