Уый рабæрæг кæны IT инфраструктурæйы хъæндзинæдтæ
Дзæуджыхъæуккаг скъоладзау Саламаты Георгий сарæзта хакертæй хъахъхъæнæг программæ. Уый рабæрæг кæны IT инфраструктурæйы хъæндзинæдтæ. Ацы хъуыддаг у дæнцæг, скъоладзауы цымыдисдзинад программированимæ фидæны дæсныйад куыд суыдзæн, æмæ нымæцон тыгъдады æдасдзинадмæ æвæрæн куыд бахæссæн ис, уыдæттæн. Бæлвырддæр радзурдзæн Чехойты Фатимæ.
Дзæуджыхъæуы 7-æм скъолайы ахуырдзау 17-аздзыд Саламаты Георгий кæд компьютеримæ кусын хорз арæхсы, уæддæр æй рагæй фæндыд йæ зонындзинæдтæ фæуæрæхдæр кæнын. Райста сæрмагонд ахуырад, программированийæ райдай æмæ проекттæ аразынæй фæуы.
Георгийы системæйæ спайда кæнын сарæхсдзæн, компьютер кæмæ ис, уыцы адæмæй алчидæр.
Æххуыс уыдзæн, информацион æдасдзинады зынаргъ комплекстæн фæрæзтæ кæмæн нæ фаг кæны, чысыл бизнесы ахæм минæвæрттæн. Программæ рагацау сбæлвырд кæны хъæндзинад, равдисы хакерты алы къахдзæф дæр.
Георгий йæ проектыл куыста, центр «Диалог»-ы цы нымæцон ахуырады центр «IT-куб» ис, уым. Цæмæй хъæппæристæй проекттæ рауайа, уый тыххæй ам сарæзтой æппæт уавæртæ. Георгийæн æххуыс кодта йæ ахуыргæнæг Павел Скворцов. Уый ныхæстæм гæсгæ, проекты фылдæр хайыл скъоладзау бакуыста йæхæдæг.
Республикæйы информацион технологиты къабаз азæй азмæ кæны парахатдæр. Скъоладзаутæн хуымæтæг сфæлдыстадон иугонд нæу, фæлæ фидæны дæсныйадмæ фыццаг къæпхæн. Уыдон базонынц программированийы сусæгдзинæдтæ, бакусынц сæхи IT-проекттыл. Ахуырадон процесс цæуы 2 азы. Чи йæ фæвæййы, уыдон бæстæйы уæлдæр ахуыргæнæндæттæм бацæуыны тыххæй райсынц уæлæмхасæн баллтæ.
