Æмбал кæмæн нæй, уыцы равдысты адæмы размæ рахастой паддзахы бинонты куклатæ
Дзæуджыхъæумæ сластой Романовты бинонты цымыдисаг куклатæ. Æмбал кæмæн нæй, уыцы равдысты адæмы размæ рахастой паддзахы бинонты куклатæ. Æрмдæснытæ куыд зæгъынц, афтæмæй куклатæн ис уд. Уыцы æууæл сæм бахæссынц чи сæ фæаразы, уыдон, стæй ма йыл бафтауынц сæ хицæуттæ. Хъазæнтæ дзурæг сты æнæхъæн дугыл. Бæлвырддæр та – династийы историйыл. Алы экспонатæн дæр дзы ис йæхи истори.
Ацы фарфор куклатыл æнусæй фылдæр цæуы. Паддзах Никъала Дыккæгæмы сывæллæтты хъазæнтæ сты æнæмæт сабидуджы нысан, егъау фыдбылызы агъоммæ. Паддазхадон музей-фæдзæхст бынат «Царское селойы» æртæсæдæ азы кадæн Светланæ Пчельникова райдыдта ацы проект. Йæ экспонаттæ сты 1890 — 1913 азмæ.
Ацы къала салдæттæй та хъазыдис паддзахы чысыл лæппу Алексей. Фæлæ Фыццаг дунеон хæст куы райдыдта, уæд Александровский галуаны хъæзтытæ фесты. Нал бæрæг кодтой Цыппурсы бон æмæ ног куклатæ дæр нал лæвар кодтой. Хъазæнтæй чи хъазыд, уыцы сабитæ ныридæгæн нал сты, фæлæ сæ куклатæ ныр дæр ма сты сæрæгас. Уый тыххæй сыл афтæ зæрдиагæй цин кæнынц уазджытæ.
Хъæдын дзуархæсджытæ æмæ æртынæм азты уырыссаг салтæттæ та ссардтой «Мосфильмы» æфтауцты. Уыдон сты паддзахы лæппу цы хъазæнтæй хъазыдис, уыдоны хуызæгтæ. Сæ руаджы лæппу ахуыр кодта Уæрæсейы Истори. Хъазæнтæ скодтой киноныв «Александр Невскийыл» куы куыстой, уæд. Сарæзтой сæ Арманд Марсель, Франц Шмидт, Симон Хальбек. Коллекцийы ис паддзахы бинонты уарзон къæбылайы быдыргъ дæр. Уый нымад у, æмбал кæмæн нæй, ахæм экспонатыл. Дзæуджыхъæумæ равдыст сластой Краснодары крайæ.
Равдыст ахæсдзæнис 12 декабырмæ, уый фæстæ та куклаты фæстæмæ аласдзысты Паддзахы хъæуы музеймæ.
