Ацы хатт республикæ бабæрæг кодтой Федералон медико-биологон агентады 85-æм клиникон рынчындоны дохтыртæ
Дзæуджыхъæумæ ссыд медицинон десант. Ацы хатт республикæ бабæрæг кодтой Федералон медико-биологон агентады 85-æм клиникон рынчындоны дохтыртæ. Цæгат Ирыстоны цæрджытæн сæ бон у райсын консультацитæ нейрохирургийы, эндокринологийы, гинекологийы æмæ æндæр къабæзтæм гæсгæ. Мæскуыйы медицинон куыстуæтты раззагдæр специалисттæ архайынц Дзæуджыхъæуы фыццæгæм поликлиникæйы бындурыл. Бæлвырддæр радзурдзæн Хъайтмазты Дзерассæ.
Нейрохирургмæ æркастмæ фыццæгтæй иу бацыд 82-аздзыд Хæбæлаты Зойæ. Сылгоймаг хъаст кæны, йæ сæр арæх æмæ тынг кæй фæриссы, стæй йæ йæ зæрдæ кæй хъыгдары, уымæй. Лæмбынæг æркасты фæстæ Уæрæсейы Федералон медико-биологон агентады рагъыстæджы æмæ астæуыстæджы магъзы патологийы центры сæргълæууæг Денис Касаткин сæвæрдта диагноз. Гæнæн ис, æмæ сылгоймаджы бахъæуа бæлвырд амбулаторон терапия. Сæххæст кæнын æй уыдзæн Федералон медико-биологон агентады клиникон рынчындоны бындурыл ацы аз æмæ уыимæ лæвар.
Æрмæст фыццаг цалдæр сахатмæ дохтыртæ æркастысты 20 адæймагæй фылдæрмæ. Травматологтæ, нейрохирургтæ, гинекологтæ, бариатрион операциты специалисттæ – алы къабæзты дохтыртæ. Сæ ныхæстæм гæсгæ, æппæтæй арæхдæр диагнозтæй иу вæййы – нуæртты дегенеративон низ. Госпитализаци æмæ дохтырты æххуыс кæй хъæуы, æппæт уыцы рынчынтæм æнхъæлмæ кæсынц медико-биологон агентады центры, адæмæн лæвар медицинон æххуыс кæныны паддзахадон гарантиты программæ æххæстгæнгæйæ.
Дзæуджыхъæуы 1-æм поликлиникæйы сæйраг дохтыр Мецъаты Зæринæйы ныхæстæм гæсгæ, ахæм акцитæ æмæ федералон специалистты æрбацыд хорз гæнæн сты республикæйы цæрджытæн диагноз сбæлвырд кæнынæн, бынæттон дохтыртæн та – се *мкусджыты фæлтæрддзинад базонынæн.
Дохтыртæ Дзæуджыхъæуы уыдзысты 25-æм сентябры онг, консультацитæ цæуынц 1-æм поликлиникæйы бындурыл. Ахæм мобилон медицинон къордтæ кусынц бæстæйы алы субъектты, сæ хыгъды ног регионты дæр.
