Консультацитæ кæнынц, йæ бон Мæскуымæ ацæуын кæмæн нæу, уыдонæн, стæй аразынц æркастытæ бæрзондтехнологон æххуыс ныридæгæн кæмæн бакодтой, уыцы адæмæн
Дзæуджыхъæумæ ссыдысты Бакулевы номыл медицинон центры специалисттæ. Консультацитæ кæнынц, йæ бон Мæскуымæ ацæуын кæмæн нæу, уыдонæн, стæй аразынц æркастытæ бæрзондтехнологон æххуыс ныридæгæн кæмæн бакодтой, уыцы адæмæн. Дохтыртæ республикæмæ фыццаг хатт не ссыдысты, фæлæ фыццаг хатт æркастысты хистæр кары адæммæ дæр. Бæлвырддæр хабæрттæ радзурдзæн Хъайтмазты Дзерассæ.
Амандæйыл афæдз æмæ рдæг йеддæмæ нæма цæуы. Цæрдæг фæлдахы йæ низы историйы сыфтæ æмæ фидар хæцы микрофоныл. Хуыбаты Мадоннæ уæззау диагнозы тыххæй базыдта йæ сывæллоны райгуырды агъоммæ. Сабийы зæрдæйæ 2 хицæн тугдадзины бæсты цæуы иу стыр. Фæлæ сын рæстæг дзæгъæлы сафынæн гæнæн нæ уыд. Куыддæр сывæллон райгуырд, афтæ Мадоннæ бацагуырдта Бакулевы номыл медицинон центры дохтырты æххуыс. Амандæйыл 20 боны цыд, гом зæрдæйыл ын операци куы скодтой, уæд.
Амандæ хорз æфтауы уæз, змæлæн функцитæ дæр ног кæнынц. Тагъд фыццаг дæндæгтæ фæзындзысты. Дохтырты æмбæлгæ æмæ афоныл æххуысы фæрцы, ныр рæздзæн куыд æнæниз сывæллон. Дохтыр Алексей Заграй радон æркаст сарæзта æмæ скодта хатдзæгтæ.
Медицинон центры специалисттæ Дзæуджыхъæуы фыццаг хатт не сты. Республикæйы вæййынц афæдз 2 хатты. Консультацитæ кæнынц, йæ бон Мæскуымæ ацæуын кæмæн нæу, уыдонæн, стæй аразынц æркастытæ бæрзондтехнологон æххуыс ныридæгæн кæмæн бакодтой, уыцы адæмæн. 2 бонмæ бынæттон дохтыртимæ федтой 150 пациентæй фылдæры. Се *хсæн низ сбæлвырд кæмæн хъæуы æмæ дзæбæх кæныны уагæвæрд баивын кæмæн æмбæлы, ахæм сывæллæттæ. Фыццаг хатт центры специалисттæ консультацитæ скодтой хистæр кары адæмæн дæр.
Сывæллæтты кардиолог, функционалон диагностикæйы дохтыр, аритмолог, стæй ма перинаталон диагностикæйы специалисттæ. Æркастмæ сывæллæтты æрбарвитынц бынæттон поликлиникæты кардиологтæ.
Бакулевы номыл центры специалистты республикæмæ æрбахонынц æнæниздзинадхъахъхъæнынады министрады сæрмагонд программæмæ гæсгæ. Пациентты дарддæр дзæбæх кæныны æппæт хæрдзтæ уыдзысты паддзахадон бюджеты фæрæзты хыгъдæй.
