Бæстыхаймæ зылд нæ уыд 50 азы онг
Дзæуджыхъæуы 1-æм поликлиникæйы дарддæр цæуы бындурон цалцæг. Бæстыхаймæ зылд нæ уыд 50 азы онг. Ныртæккæ цалцæггонд хайы кусынц пациенттимæ, иннæ хайы та специалисттæ ивынц хæтæлтæ, электрон тыхдæттæг телтæ, бæстыхайы сæр, стæй кæнынц мидæггаг куыстытæ. Бындурон цалцæг цæуы сæрмагонд программæмæ гæсгæ. Объекты тыххæй бæстондæр радзурдзæн Чехойты Фатимæ.
Цалцæджы рæстæг дохтыртæ къуындæг уавæрты кусынц. Фæлæ пациенттæн ацы рæстæг сси æнцонвадат. Болæтаты Каринæйæн ис 3 сабийы. Иууылдæр хауынц ацы медицинон куыстуатмæ. Сывæллæттæн сæ кæстæр ныртæккæ ам цæуы диспансеризаци.
Рагæй цы цалцæгмæ æнхъæлмæ кастысты, уый хатдзæгтæн ныридæгæн аргъ скæнын сæ бон у пациенттæн æмæ поликлиникæйы кусджытæн. Фæрниаты Луизæйæн поликлиникæ æрмæст куысты бынат нæу. Йемæ баст сты йæ сабибонты мысинæгтæ. Йе *взонг азты йæхæдæг дæр ам фидар кодта йе *нæниздзинад. Кусы дзы 36 азы. Ныртæккæ разамынд дæтты педиатрийы хайадæн. Тынг æнхъæлмæ кæсы цалцæггæнæн куыстыты кæронмæ. Фæнды йæ къæридор æмæ йæ кабинет саив кæнын – поликлиникæ уæддæр сывæллæттæн у.
50 азы дæргъы поликлиникæйы бæстыхайы бындурон цалцæггонд нæ уыд. 8 азы размæ дзы конд æрцыдысты уæлæнгай куыстытæ. Фæлæ уый уавæр зынгæ нæ фæхуыздæр кодта. Тынг ныззæронд сты коммуникацитæ. 17 мин сывæллоны æнæниздзинадмæ каст цы медицинон куыстуатуаты цæуы, уым бирæ къуылымпыдзинæдтæ уыд. Цалцæггæнæн куыстытæ райдыдтой ацы аз федералон программæ «Модернизация превичного звена» æххæстгæнгæйæ.
Поликлиникæйы бæстыхай у æртæуæладзыгон. Алкæцыдæр сæ ахуырст у алыхуызон ахорæнтæй. Фыццаг у кæрдæгхуыз, дыккаг – бур, у педиатрты уæладзыг, æртыккаг – æрвхуыз, уым уыдзысты специалистты кæбинеттæ. Арæзтадон куыстуаты минæвæрттæ ахорæнтæ *взæрстой медицинон кусджыты фæндонмæ гæсгæ. Ныридæгæн æрмæст фыццаг уæладзыджы хай рæвдз нæу. Тагъд рæстæг цæттæ уыдзæн дыккаг уæладзыг æрдæгмæ, йæ иннæ хайы цæуы демонтаж. Æртыккаджы ма баззадысты уæлæнгай куыстытæ. Уыцы иу рæстæг цалцæг кæнынц бæстыхайы æддаг къул. Фæнд кæнынц лифт баивын дæр.
Поликлиникæйы бындурон цалцæг фæуыдзæн ноябры кæрон. Куыстытæ цæуынц фæткмæ гæсгæ, зæгъынц специалисттæ. Афæдзы кæрон та дохтыртæ рынчынты дзæбæх кæндзысты сæхи кабинетты. Æцæг – ноггонд уавæрты.
