Уый ахуыргæнæдоны у æртыккаг фæсарæйнаг æвзаг
Дзæуджыхъæуы 11-æм скъолайы ахуырдзаутæ райдыдтой китайаг æвзаг ахуыр кæнын. Уый ахуыргæнæдоны у æртыккаг фæсарæйнаг æвзаг. Абон китайаг чи зоны, ахæм специалистты фылдæрæй-фылдæр агурынц. Ацы æвзаг ахуыр кæнын зын у, фæлæ педагог бакуыста йæхи методикæйыл. Цавæрыл, уый тыххæй бæлвырддæр радзурдзæн Хъайтмазты Дзерассæ.
Афтæ ахадгæйæ Дзæуджыхъæуы 11-æм скъолайы 7-æмкъласонтæ зонгæ кæнынц Скæсæйнаг культурæимæ. Ацы ахуыры азæй райдыдтой китайаг æвзаг ахуыр кæнын. Сывæллæттæн æй амоны Валерия ФилОнова. Нырма студенткæ уæвгæйæ, дыккаг фæсарæйнаг æвзагæн йæхицæн равзæрста ацы къабаз, фæлæ рæстæгимæ китайаг Валерияйæн сси фыццаг æвзаг.
Китайаг æвзаг ахуыр кæнын тынг зын у, домы фæразондзинад. Валерия Филонова бакуыста методикæйыл. Уымæ гæсгæ сывæллæттæ банкъарынц Скæсæйнаг бæстæйы тæваг.
Ахуыр кæныны сæйрагдæр хъуыддæгтæй иу у – раст дзурынад – иу дзырдæн, зæлынады алы æмвæзады зæгъгæйæ, ис алыхуызон нысаниуæг.
Уæрæсейы æмæ Китайы *хсæн ахастдзинæдтæ азæй-азмæ æнтыстджындæрæй рæзынц алы къабæзты. Уымæ гæсгæ, скъолайы рахастой, ахуырадон программæмæ, куыд æртыккаг фæсарæйнаг æвзаг равзарынæн, афтæ китайаг бахæссыны уынаффæ.
Сывæллæттæн сæ бæллиц у Китайаг Адæмон Республикæ бабæрæг кæнын. Уыдон æмбарынц æмæ аргъ кæнынц, æппæт республикæйы скъолатæй æнæмæнг 11-æмы фыццаг кæй райдыдтой ацы дисциплинæ ахуыр кæнын, уымæн.
Фæсарæйнаг æвзæгтæ арфдæр кæм ахуыр кæнынц, уыцы скъолаты хуызæн, 11-æм дæр дыккагæн равзæрста немыцаг æвзаг. Фæлæ сæм уый фаг нæ фæкаст.
Директоры хæдивæджы ныхæстæм гæсгæ, сывæллæттæ Валерияйы бирæ уарзынц, уый та сын уарзын кæны китайаг æвзаг.
