Ацы ахуырадон хъæппæрис æххæстгонд цæуы Уæрæсейы субъектты хицауадон оргæнтимæ æмæ паддзахадон корпораци «Роскосмос»-имæ скъоладзауты профессионалон ориентацийæн æмæ аэрокосмикон къабазæн.
Дзæуджыхъæуы 3 скъолайы æмæ Къомайты Русланы номыл космонавтикæйы скъолайы царды уадзынц федералон проект «Космикон кълас». Ацы ахуырадон хъæппæрис æххæстгонд цæуы Уæрæсейы субъектты хицауадон оргæнтимæ æмæ паддзахадон корпораци «Роскосмос»-имæ скъоладзауты профессионалон ориентацийæн æмæ аэрокосмикон къабазæн. Цæмæй сывæллæттæн Дун-дунеимæ зонгæ кæнын цымыдисагдæр уа, уый тыххæй Дзæуджыхъæумæ ссыд космонавт Андрей Бабкин. Бæлвырддæр радзурдзæн Хъайтмазты Дзерассæ.
Космонавты дæсныйады сусæгдзинæдтæ раргом кæнын, стæй сæ куыд цæттæ кæнынц, уый тыххæй Дзæуджыхъæуы скъоладзаутæ базыдтой, ацы хъуыддагимæ комкоммæ баст чи у, уымæй. Роскосмосы космонавтты отряды разамонæджы хæдивæг Андрей Бабкин 44-æм скъолайы ис сæрмагонд нысанимæ – Дун-дунейы фидæны алы иртасæгæн дæр радзурын æрмæст дæсныйады нæ, фæлæ зындзинæдты тыххæй дæр. Сабийæ йæхи бæллиц дæр уыд, космосы бæрзæндтæм схизын, абон та йæхæдæг дзуапп дæтты ахæм лæппуты æмæ чызджыты фæрстытæн.
Космос сæм цыма хæстæгдæр æрбаци, афтæ кæсы, зæгъынц скъоладзаутæ. Андрей Бабкин архайдта ахуырдзауты æвзонг космонавтты рæнхъытæм исыны кадджын мадзалы. Уыдон сты Дзæуджыхъæуы 3 скъолайы ахуырдзаутæ. Се *хсæн Джыккайты Алинæ дæр. Фæнды йæ космосы сусæгдзинæдтæ раиртасын.
Ахуырадон интенсив «Посвящение в космонавты» арæзт æрцыд федералон проект «Космикон кълас»-мæ гæсгæ. Æххæстгонд цæуы Роскосмосимæ иумæ. Сывæллæтты скъолайы предметтæ ахуыр кæнынц ракетæтæ аразыны æмæ космикон технологиты призмæйы уылты.
Космикон кълæстæ сты рагпрофессионалон цæттæдзинады ног къабаз. Цæгат Кавказы космонавтикæйы иунæг скъолайы бындурыл проект æххæстгонд цæуы дыккаг аз. Ахуырады методикæтимæ æмæ космикон кълæсты хатдзæгтимæ базонгæ уæвыны тыххæй æрбацыдысты Уæрæсейы алы регионты æмæ Хуссар Ирыстоны космонавтикæйы музейты æмæ скъолаты разамонджытæ æмæ педагогтæ. Сæ ныхæстæм гæсгæ, ахæм проекттæ сывæллæттæн дæттынц æрмæст зонындзинæдтæ нæ, фæлæ ма сæ ахуыр кæнынц нысантæ æвæрын æмæ сæ æххæст кæныныныл – уыцы æууæлтæй æххæст вæййы алы иртасæг дæр.
Ахæм «космикон» проекттæ сывæллæттæн æххуыс кæнынц ахсджиаг зонындзинæдтæ райсын. Ам скъолайы предметтæ амонынц цымыдисаг хуызы. Æмæ гæнæн ис, æмæ сæрмагондæй фидæны ацы рæзгæ фæлтæр фысдзæн бæстæйы космонавтикæйы истори.
