Ног кæнынц къултæ æмæ асинтæ
Дзæуджыхъæуы 38-æм скъолайы цæуынц цалцæггæнæн куыстытæ. Ног кæнынц къултæ æмæ асинтæ. Райдиан кълæсты скъоладзаутæ та ахуыр кæнынц, куыстытæ кæм фесты, уыцы бæстыхайы. Уæвгæ та скъола арæзт æрцыд 1973-æм азы, æмæ уыцы мгъуыдмæ бындуронæй цалцæггонд никуы уыд. Дарддæр ацы темæйыл радзурдзæн Фидараты Маринæ.
Ацы ран ма хъæуы къултæ чъырæй сцæгъдын. Аразджытæ дзы ныридæгæн сæвæрдтой къæйдур. Уæвгæ та 38-æм скъолайы цалцæг цæуы хайгай. Сног кодтой къоридортæ æмæ асинтæ. Куыстытæм бавнæлдтой æрæджы, дистанцион ахуырадмæ куы рахызтысты æмæ рагагъоммæ каникултæ куы райдыдтой, уæд. Кæцыдæр блокты цалцæггæнæн куыстытæ фесты.
Æдæппæтæй скъолайы ахуыр кæны 1678 адæймаджы. Уыдонæй 659 ахуырдзауы сты райдиан кълæсты. Ахуырадон процесс сын цæуы ног цалцæггонд бæстыхайы. Фæлæ ма цалдæр боны размæ ныййарджытæ тыхстысты, скъола цæттæ кæй нæу сабиты суазæг кæнынмæ, уымæй.
Интернеты хызы цы видеоæрмæг фæзынд, уым æвдыст цыдысты цалцæггæнинаг къоридортæ. Фæлæ хъуыддаг æндæр уавæры ис. Скъоладзаутæ сæхæдæг дæр æвдисæн сты хуыздæрырдæм ивддзинæдтæн.
Скъолайы бæстыхай арæзт æрцыд 1973-æм азы. 50 азмæ ам бындурон цалцæг никуы уыд. Æрмæст-иу сæрдыгон педагогтæ сæхи хъарутæй бацархайдтой бæстыхай сног кæныныл. Фæлæ уæддæр уыд бындуронæй цалцæггæнинаг. Ныртæккæ хицæн блокты куыстытæ цæуынц дарддæр. Кæмдæр хъæуы линолеум æмæ къæйдур сæвæрын, кæмдæр та къултæ сцæгъдын. Фæллойадон бригад куыстытæм бавналы фæсурокты, боны дыккаг æмбисы.
