Ахуыргæнæндоны юбилейы кадæн мадзал арæзт æрцыди горæты администрацийы
Дзæуджыхъæуы Советон Цæдисы хъæбатыр Хъыбызты Алыксандры номыл 4-æм гимназ сбæрæг кодта йæ 120 азы бон. Ахуыргæнæндоны юбилейы кадæн мадзал арæзт æрцыди горæты администрацийы. Ныхас цыди, гимназы цы бирæ хорз æгъдæуттæ æмæ традицитæ ныффидар, уыдоныл. Æнусæй фылдæр алы фæлтæры педагогтæ архайынц уыцы хæзнатæ бахъахъхъæныныл, стæй ма сæм сæхæдæг хæссынц нырыккон æууæлтæ дæр. Æрæджы гимназ сцалцæг кодтой бындуронæй. Стæй ма райста лæвар дæр – материалон-техникон бындур сног кæнынæн 3 сæдæ мин сомы. Лицейы директор Цуциты Сосланæн сертификат радта Дзæуджыхъæуы администрацийы сæргълæууæг Милдзыхты Вячеслав. Куыд загъта, афтæмæй ахуырад у царды ахсджиагдæр къабæзтæй иу, æмæ ахуыргæнджытæн йæ зæрдæ загъта ноджы стырдæр æмæ уæлдæр къæпхæнтæ, скъоладзаутæн та ног æнтыстытæ.
