Рацарæзтмæ бахаудтой ахуыргæнæдоны сæйраг бæстыхай æмæ райдиан скъола
Дзæуджыхъæуы 7-æм скъолайы бындурон цалцæг кæронмæ фæхæццæ кæны. Рацарæзтмæ бахаудтой ахуыргæнæдоны сæйраг бæстыхай æмæ райдиан скъола. Объектты техникон цæттæдзинад у 90 проценты. Куыстытæ æххæстгонд цæуынц национ проект «Фæсивæд æмæ сывæллæттæ»-м гæсгæ. Бæлвырддæр радзурдзæн Хъайтмазты Дзерассæ.
Райдзаст кабинет, ног хъæддзаума, техникæ æмæ сæрмагонд лабораторон партæтæ – ахæм уавæрты кусын удæнцой у, зæгъы химийы ахуыргæнæг Людмила Есипко. Йæ кълас аивгонд æрцыд Дзæуджыхъæуы 7-æм скъолайы модернизацийы фыццаг къæпхæнмæ гæсгæ. Цалцæгмæ тынг æнхъæлмæ кастис, уымæн æмæ йæхæдæг дæр кæддæр ам ахуыр кодта. Куыд зæгъы, афтæмæй бæстыхай фæлæггад кодта 50 азæй фылдæр. Схъомыл дзы цалдæр фæлтæры сывæллæттæ, æмæ дзы ныр ног цард бауагътой.
Цæмæй сывæллæтты æндæр скъоламæ ивын æмæ ахуырадон процесс 2 радыл дих кæнын ма бахъæуа, уый тыххæй бындурон цалцæджы куыстытæ снысан кодтой 2 азмæ. Модернизацимæ бахаудтой ахуыргæнæдоны сæйраг бæстыхæй æмæ райдиан скъола. Специалисттæ баивтой пъолтæ, инженерон хызтæ, саив кодтой агъуыстытæ, сног кодтой материалон-техникон ифтонггæрзтæ. Ныртæккæ ма баззад базилын актон залмæ, 8 кабинетмæ, къæлидортæм, библиотекæмæ, хæрæндонмæ, 2 спортзалмæ. Бындурон цалцæг фæуыдзæн августы кæрон.
1969-æм азæй бæстыхай бындуронæй фыццаг хатт цалцæг кæнынц. Уæвгæ та, 7-æм скъолайы истори райдыдта бирæ раздæр, фарон ыл сæххæст 125 азы. Ахуыргæнæндоны хъæздыг истори хъахъхъæд цæуы йæ музейы. Уымæ дæр базылдысты бындурон цалцæджы 1-аг къæпхæнмæ гæсгæ. Ам æвдыст цæуы скъолайы райрæзты хронологи йæ фыццаг бонтæй ныры онг. Ис дзы бирæ æрмæджытæ. Сæрмагонд æргом здæхт цæуы ивгъуыды æмæ абоны царды хъæбатыртæм.
Скъолайы администрацийы курдиатмæ гæсгæ, проектмæ бахастой чысыл ивддзинæдтæ. Зæгъæм, уый хауы къæлидорты хуызмæ, кабинетты дизайнмæ, асинтыл скодтой æфсæйнаг перилæтæ.
Куыстытæ æххæстгонд цæуынц национ проект «Фæсивæд æмæ сывæллæттæ»-м гæсгæ. Æдæппæтæй республикæйы бындуронæй сцалцæг кæндзысты 30 скъолайы.
