Фæнды сæ базонын, сæ размæ цавæр цæлхдуртæ ис, уыдон æмæ сæ риссагдæр фарстатæ иумæйаг тыхтæй алыг кæнын.
Дзæуджыхъæуы музейтæм хъæуы базилын æмæ сæ банывыл кæнын. Ахæм уынаффæ рахастой горæты Æхсæнадон Советы къамисы уæнгтæ. Ацы хатт бабæрæг кодтой раздæры мещанин Казаровы хæдзар. Ныртæккæ та бæстыхай хæссы Дзæуджыхъæуы историйы музейы ном. Бæрнон кусджыты балцы хатдзæгтæм гæсгæ, хъæуы æддаг бакасты фæйнæг æмæ къахвæндаг баивын. Уымæй дарддæр, гæнæн æмæ амалæй музеймæ бацæуæн центрон уынгмæ рахæссын. Дарддæр радзурдзæн Гуытъиаты Алинæ.
Амонæн фæйнæг баивын, тротуар сцалцæг кæнын, бацæуæн та сæйраг уынгмæ рахæссын. Дзæуджыхъæуы æхсæнадон совет æрзылдис Горæты историйы музейыл. Фæнды сæ базонын, сæ размæ цавæр цæлхдуртæ ис, уыдон æмæ сæ риссагдæр фарстатæ иумæйаг тыхтæй алыг кæнын.
Музейы бæстыхай йæхæдæг раст экспонаты хуызæн у. Арæзт у модерны хуызы, хъуыды та йæ æркодта Сергей Казаров. Дыккаг уæладзыджы цардис бæстыхайы хицау, фыццаг уæладзыджы та уыдысты типографи, газетты æмæ журналты редакци. Музей бахъахъхъæдта уæды заманты мыхуыры станоктæ.
Ахæм хуызы уыдис 1909 азы газет Терекы редакци. Уым фæллой кодтой Хетæгкаты Къоста, Тугъанты Махарбег, Байаты Гаппо. Ныр дæр ма æнæвнæлдæй сты публицист Цæголты Георгий æмæ фельетонист Александр Солодовы куысты бынæттæ.
Ацы стъолы уæлхъус та куыста Сергей Киров. Фараст азы бакуыста Терекы. Ам базонгæ революционер йæ цардæмбал Мария Маркусимæ. Иу агъуысты æрæмбырд сты историйы дæсгай азтæ. Уыцы истори гæнæн ис æмæ фæуæрæхдæр уа.
Музей горæты сæйраг уынджы кæй ис, уый тыххæй йæм туристтæ зæрдиагæй цыдысты. Экспертты хъуыдымæ гæсгæ, бæстыхайæн хъæуы раздахын йæ раздæры хуыз, бæлвырддæр та бацæуæнæн.
Æхсæнадон советы куыд зæгъынц, афтæмæй иумæйаг тыхтæй горæт ис ноджы саивдæр кæнæн. Сæйрагдæр у иумæ бавналын.
